Ադրբեջանն ու Վրաստանն ակտիվացրել են իրենց բանակցությունները Բաքու-Թբիլիսի-Կարս երկաթուղու կառուցման շուրջ: Մասնավորապես, այդ հարցը քննարկվել է Վրաստանի տարածաշրջանային զարգացման և ենթակառուցվածքների նախարարի՝ անցած շաբաթ Բաքու կատարած այցի ժամանակ: Նախնական տվյալներով, նախատեսվում է երկաթուղին շահագործման հանձնել 2012 թ. առաջին կեսին:
Նկատենք, որ Ադրբեջանում չափազանց ոգևորված են այս երկաթուղու կառուցմամբ, քանի որ, բացի տնտեսական առավելություններից, այն հնարավորություն կտա նաև մեկուսացնել Հայաստանը:
«Կովկաս» ինստիտուտի փոխտնօրեն, քաղաքագետ Սերգեյ Մինասյանի գնահատմամբ, այդ երկաթուղու կառուցումը չափազանց ծախսատար է, և դեռևս մի քանի տարի առաջ Ադրբեջանն արդեն 200-300 մլն դոլար է ծախսել, սակայն արդյունքը դեռևս տեսանելի չէ. «Վերջին մեկ ամսվա ընթացքում Ադրբեջանը ևս 500 մլն դոլար է հատկացրել այդ ծրագրի համար, սակայն դա ևս ինչ-որ տեղաշարժ չի արձանագրել երկաթուղու շինարարության առումով: Հասկանալի է, որ այս երկաթգծի կառուցումը բավական թանկ հաճույք է Ադրբեջանի համար»:
Մինասյանը նկատեց, որ քանի կա Վրաստանի գործոնը, Ադրբեջանը միշտ հնարավորություն ունի շրջանցելու Հայաստանը, սակայն այս երկաթգիծը դեռևս չի նշանակում Հայաստանի 100 տոկոսով մեկուսացում: Մինասյանի գնահատմամբ, դա ավելի շատ շրջանցում է, քան մեկուսացում:
Այդուամենայնիվ, ըստ քաղաքագետի, Վրաստանը մասնակցում է Հայաստանի շրջանցմանը, և դա էլ մեկ այլ խնդիր է:
