Այսօր աշխարհում հաշվարկվում է ավելի քան 95 մլն միգրանտ, որոնք արտագաղթել են աշխատանք գտնելու նպատակով: Ըստ ՄԱԿ-ի կանխատեսումների՝ թեև միգրանտների թիվը տարեցտարի մեծանում է, սակայն աշխարհի բնակչությունը ևս շատ արագ աճում է, որի արդյունքում միգրանտների տոկոսը աշխարհի բնակչության մեջ կմնա 3%: Այս մասին ասվում է «Արժանապատիվ աշխատանք որոնելիս. Աշխատանքային միգրանտների իրավունքները» գրքում, որի հայերեն տարբերակի շնորհանդեսը տեղի ունեցավ այսօր: Միջոցառմանը ներկա էին Մոսկվայում տեղակայված ԱՄԿ արժանապատիվ աշխատանքի տեխնիկական աջակցության թիմի ներկայացուցիչները, որոնք համակարգում են Հայաստանում ԱՄԿ գործունեությունը, ինչպես նաև Հայաստանի արդյունաբերողների և գործարարների միության, արհմիությունների կոնֆեդերացիայի, զբաղվածության պետական ծառայության և մի շարք նախարարությունների ներկայացուցիչներ: Բանախոսների ասելով` աշխատանքային միգրանտերի թիվը աշխարհում գնալով մեծանում է` պայմանավորված երկրների միջև և երկրների ներսում անհավասարությունների խորացմամբ: Այսինքն` աշխատուժի պակաս ունեցող հարուստ երկրների և անբավարար աշխատատեղերով աղքատ երկրների միջև ճեղքվածքը գնալով մեծանում է, ինչն էլ մեծացնում է աշխատանքային միգրանտների թիվը ողջ աշխարհում: Հայաստանից աշխատանքային միգրացիայի տեմպերը ևս գնալով մեծանում են: Այս տարվա հունվար-սեպտեմբեր ամիսներին, պաշտոնական տվյալներով, Հայաստանից մեկնումների թիվը 64.9 հազարով գերազանցել է ժամանումների թվին, ինչը 18.1 հազարով կամ 38.7%-ով ավելի է 2009 թ. նույն ժամանակահատվածում արձանագրված համապատասխան ցուցանիշից: