Միչիգան նահանգի Ռոքֆորդ քաղաքում բնակվող Քեթերի և Ջեյ Շվոնդների ընտանիքում ծնվել է 12-րդ արու զավակը:
Նորածին Թաքեր Ռեյ Շվոնդի և իր ավագ եղբոր միջև տարբերությունը 21 տարի է:
Ծնողներն ասել են, որ մինչ ծնունդը չեն իմացել իրենց ոչ մի երեխայի սեռը, քանի որ չեն հարցրել բժշկին: Ուստի նրանք 12 անգամ անակնկալի են եկել:
Ջեյ Շվոնդը NBC News-ի լրագրողներին ասել է, որ իրենք հույս ունեին, թե աղջիկ կծնվեր, սակայն այդպես չեղավ:
«Ես վստահ եմ, որ հիանալի կլիներ փոքրիկ աղջնակի հայր լինելը, և ինձ շատ հետաքրքիր է իմանալ՝ ինչպես դա կլիներ իրականում: Բայց մենք չենք զայրանում, քանի որ մեր տղաների հետ մենք չենք ձանձրանում: Ինձ երբեմն թվում է, որ ես գտնվում եմ տղաների սպորտային հանդերձարանում»,- ասել է Ջեյը:
Զարմանալի է, սակայն բազմազավակ ծնողները դեմ չեն 13-րդ անգամ փորձել դուստր ունենալ: