Ռուսական Regnum գործակալության փոխանցմամբ, երեկ թուրքական մի շարք քաղաքներում մոտ 10,000 թուրքեր դուրս են եկել փողոց` իրենց բողոքն արտահայտելու ընդդեմ ինտերնետային գրաքննության: Ցույցերին մասնակցած երիտասարդները «զինված» են եղել Don’t touch my internet (Մի՛ դիպչիր իմ ինտերնետին) և «Մենք բոլորս պոռնոգրաֆիա ենք» պաստառներով:
Թուրքական իշխանությունները որոշել են «արմատական գրաքննության» ենթարկել ինտերնետը, ինչի նպատակը քաղաքացիներին պոռնոգրաֆիայից ու անբարոյականությունից պաշտպանելն է:
Հիշեցնենք, որ Թուրքիայի տեղեկատվական տեխնոլոգիաների խորհուրդը (BTK) փրովայդերներից պահանջում է հաստատել 4 ֆիլտրերից մեկը. «ստանդարտ», «ընտանեկան», «մանկական» և «տնային»: Այս օրենքի հեղինակների կարծիքով, այդ ֆիլտրերը երեխաներին զերծ կպահեն անպետք տեղեկատվությունից:
Բացի այդ, ընտրվել է 138 բառ (օրինակ՝ անգլերեն fetish, hot և teen), որոնք չեն կարող գործածվել որպես, այսպես կոչված, դոմեններ:
Ֆիլտրման չենթարկված կայքեր մուտք գործելու փորձերը կհավասարեցվեն իրավախախտման և կպատժվեն խոշոր տուգանքով: Ինտերնետ մուտք գործելու նոր կանոնները ներդրվելու են օգոստոսի 22-ին: Հազարավոր թուրքեր օգոստոսի 22-ն արդեն իսկ կնքել են Թուրքիայում «ինտերնետի մահվան» օր:
