2009 թ., ըստ մեր տարածքային կառավարման նախարարությանն առընթեր միգրացիոն պետական գործակալության, Հայաստանի միգրացիայի բացասական սալդոն (հանրապետությունից մեկնածների թվի գերազանցումը հանրապետություն ժամանածների թվին) կազմել է 25 հազար մարդ (http://backtoarmenia.am/?hcat=85&scat=87):
Սակայն դիտելով Ռուսաստանի պետական վիճակագրական մարմնի սայթը՝ տեսնում ենք, որ Հայաստանից Ռուսաստան 2009 թ. միգրացիայի դրական սալդոն կազմել է 34 770 մարդ (http://www.gks.ru/bgd/free/b11_00/IssWWW.exe/Stg/dk01/7-0.htm կայքէջի 4-րդ աղյուսակ):
Այս պարագայում որքանո՞վ են Հայաստանից ուղևորահոսքերի վերաբերյալ տվյալները արտացոլում իրականությունը, երբ որ Հայաստանից միգրացիայի բացասական սալդոյի վերաբերյալ ՀՀ տվյալները հակասում են ՌԴ վիճակագրական ծառայության հրապարակած տվյալներին։ Այս հարցն այսօր «Առաջին լրատվականն» ուղղեց միգրացիոն պետական գործակալության պետ Գագիկ Եգանյանին։
«Ես ուրախ եմ, որ ուշադրություն եք դարձրել այդ հանգամանքի վրա, այո, որոշակի անհամապատասխանություն կա ռուսական և հայկական աղբյուրների միջև։ Եվ այդ անհամապատասխանությունը պարզելու համար առնվազն ուսումնասիրություն է պետք անել։ Այսինքն՝ հիմա չես կարող ասել՝ մեթոդաբանությա՞ն խնդիր է, թե՞, ասենք, այն, որ ՀՀ քաղաքացիների մի զգալի մասը երկքաղաքացիություն ունի, և սահման հատելուց տարբեր տեղերում տարբեր անձնագրեր է ներկայացնում։ Այսինքն՝ լուրջ ուսումնասիրման հարց է»,- ասաց Գ. Եգանյանը։
Նա տեղեկացրեց, որ 20 օր առաջ այս հարցի հետ կապված նամակ է գրել ՌԴ դաշնային միգրացիոն ծառայության ղեկավար, գեներալ գնդապետ Կոստանտին Ռադանովսկուն։ «Ես նշել եմ այդ տարբերությունների մասին, այդ տարբերությունները ուսումնասիրելու մեր ցանկության և համապատասխան աշխատողներ գործուղելու մասին՝ ակնկալելով, որ իրենց կողմից հնարավորություն կտրվի մեզ այդ բազաներին ծանոթանալու, մեթոդաբանությունն ուսումնասիրելու»,- ասաց Գ. Եգանյանը։
