Հայաստանում Լեհաստանի դեսպան Զդիսլավ Ռաչինսկուն, որն այսօր հյուրընկալվել էր Երևանում ՆԱՏՕ-ի տեղեկատվական կենտրոնում, «Առաջին լրատվականը» հարց ուղղեց Ղարաբաղյան կարգավորման գործընթացում խաղաղապահների տեղակայման գործում ՆԱՏՕ-ի հնարավոր ներգրավման առնչությամբ, թեև հայտնի է, որ ՆԱՏՕ-ի բարձրաստիճան պաշտոնյաները մշտապես հայտարարել են, որ աջակցում են ԵԱՀԿ Մինսկի խմբին ԼՂ կարգավորման գործընթացում:
«ՆԱՏՕ-ի գլխավոր քարտուղարը հայտարարել է, որ ներկա պահին չի տեսնում իր դերը այդ հարցում: Դա տարածաշրջանային էթնիկ խնդիր է, որի լուծումը կախված է միայն երկու հարևան երկրներից: Մյուս երկները կարող են միայն միջնորդ հանդիսանալ: Հույս ունեմ, նաև ինչ-որ չափով հավատում եմ, որ ինչ-որ պահի Հայաստանը և Ադրբեջանը փոխզիջումային լուծում կգտնեն: Իսկ խաղաղապահ ուժերի առկայության անհրաժեշտությունը կլինի այն ժամանակ, երբ Հայաստանի և Ադրբեջանի միջև համաձայնագիր կնքվի: Սակայն կարծում եմ, որ խաղաղապահ ուժերի տեղակայումը ընդունելի չի լինի Իրանի և Ռուսաստանի համար:
Բայց միաժամանակ կարող եմ ասել, որ այդ հարցում կարող են գործել այլ կառույցի` ԵՄ-ի ուժերը: Ես հեռու ապագայում տեսնում եմ ՆԱՏՕ-ի մասնակցությունը այդ տարածաշրջանում, օրինակ` տեխնիկական աջակցության տեսանկյունից` ականազերծման բարեփոխումների, արդիականացումների ոլորտներում»,- հայտարարեց դեսպան Զդիսլավ Ռաչինսկին:
