«Առաջին լրատվական»-ի տեղեկություններով հայտարարված Համաներմանն ընդառաջ Հայաստանի քրեակատարողական հիմնարկներում սկսել են պատրաստել այն անձանց գործերը, ում վրա ազդելու է համաներումը։ Մոտ մեկ ամիս առաջ ՀՀ Արդարադատության նախարարությունը «գաղտնի» պանակով Քրեակատարողական հիմնարկների վարչություն է ուղարկել Համաներման մասին օրենքի նախագիծը, որը վերջնական օրենքի տեսք կստանա առաջիկա չորեքշաբթի օրը` Ազգային ժողովի մեծամասնության կողմից քվեարկությունից հետո։
«Մեր աղբյուրները հայտնում են, որ այն չորս հարյուր ազատազրկվածներին, որոնք ազատ են արձակվելու համաներման արդյունքում, քրեակատարողական հիմնարկների սոցիալ հոգեբանության բաժնի աշխատակիցները մոտենում և նշում են այն գումարը, որի դիմաց նրանք դրական բնութագիր կպատրաստեն տվյալ կալանավորի համար։ Այդ գումարը տատանվում է 150-200 դոլարի սահմաններում։
Անվտանգության աշխատակիցները, կալանավորներից պահանջում են մոտ 300 ԱՄՆ դոլար` մինչև համաներում նոր տույժեր չձևակերպելու և կամ եղած տույժերը մարելու համար։
Այնուհետև, առանձնազրույցի է կանչում ՔԿՀ պետի տեղակալը և պետի անունից կալանավորին հրահանգում, որ 500 ԱՄՆ դոլարի դիմաց միայն հնարավոր կդառնա օրենքի կիրառումը կալանավորի վրա։ Ընդհանուր առմամբ, համաներման մասին օրենքի ընդունումը նստում մինչև 1000 ԱՄՆ դոլար։
