Մի քանի հազար մարդ փորձել են Սիրիայի տարածքից Թուրքիա անցնել: Նրանց կանգնեցնելու ժամանակ առնվազն 18 թուրք սահմանապահներ վիրավորվել են, տեղեկացնում է Reuters գործակալությունը:
Գործակալության տվյալներով՝ հարձակվողները, ամենայն հավանականությամբ մաքսանենգներ են եղել: Նրանց թիվը 2,5-3 հազար է գնահատվում: Նրանք զինվորականների վրա քարեր և վառվող խառնուրդով շշեր են նետել, ինչպես նաև կրակել են որսորդական հրացաններից: Գործակալությունը ենթադրյալ մաքսանենգների կողմից տուժածների մասին չի հաղորդում:
Իրենց հերթին թուրք զինծառայողները բարձրախոսների միջոցով կոչ են արել հավաքվածներին հեռանալ: Բախումները սկսվելուց հետո նրանք արցունքաբեր գազ են կիրառել և օդում կրակելով փորձել են հետ մղել հարձակվողներին: Դեպքի վայր լրացուցիչ 300 զինծառայողներ են տեղափոխվել: Հաղորդագրության մեջ չի տեղեկացվում՝ արդյոք հարձակվողներին հաջողվե՞լ է Թուրքիա հասնել, թե՞ ոչ:
Թուրքական զինված ուժերի ներկայացուցիչների խոսքերով՝ միշտ էլ տարբեր երկրներից մաքսանենգներ են փորձել հատել Թուրքիայի սահմանը, սակայն սահմանապահների և մեծ թվով մարդկանց հետ բախումները համեմատաբար վերջերս են սկսվել: Մասնավորապես, նմանատիպ դեպք էր տեղի ունեցել անցած շաբաթ, երբ սահմանն անցնել փորձող մի քանի հարյուր մաքսանենգների կանգնեցրել էին զինծառայողները:
