Արձակուրդների սեզոնը աստիճանաբար ավարտվում է, բայց գրասենյակային շատ աշխատակիցներ դեռ երկար ժամանակ չեն կարողանում հարմարվել աշխատանքային ռեժիմին՝ հաճախ ընկելով ընկճախտի մեջ: Հոգեբանները պարզ խորհուրդներ են տալիս, թե ինչպես չտխրել արձակուրդից հետո և ավելի արագ հարմարվել աշխատանքային գրաֆիկին:
Պասիվությունը, ցրվածությունը, չհիմնավորված հոգնածության զգացողությունը և ձանձրույթը, այսպես կոչված, հետարձակուրդային ախտանշաններ են: Հոգեբանները նշում են, որ նման վիճակի պատճառն ու պայմանները կարող են շատ տարբեր լինել, այդ պատճառով մեթոդներն էլ կարող են անհատական լինել:
Կարիք չկա երկարաձգելու արձակուրդը
Ամերիկացի գիտնականները պարզել են, որ որքան կարճ է հանգիստը, և որքան հաճախ է այն կրկնվում, այնքան վառ են տպավորություններն ու հիշողությունները: Նաև՝ կարճատև հանգստի ընթացքում երջանիկ պահեր ավելի հաճախ են տեղի ունենում և ավելի լավ են հիշվում: Փորձագետները կարծում են, որ արձակուրդի լավագույն չափը մեկ կամ մեկուկես շաբաթն է:
Հոգեբանների կարծիքով՝ որքան երկար է արձակուրդը, այնքան դժվար է մարդը վերադառնում իր աշխատանքային ռեժիմին:
Մասնագետները խորհուրդ են տալիս նաև չգնալ գայթակղության հետևից և չերկարացնել արձակուրդը կամ հավելյալ հանգստյան օրեր վերցնել: Դրան կարող են հաջորդել ավելի խորը դեպրեսիա և էմոցիոնալ ճգնաժամ: Զբոսաշրջային ընկերության տվյալներով՝ կրկնակի ուղևորություն կատարելու որոշում կայացնում են միայնակ կանայք և մինչև 35 տարեկան երիտասարդները:
Վիտամիններ և երջանկության հորմոններ
Փորձագետները հավաստիացնում են, որ տխրությունն ու ձանձրույթը հնարավոր է հաղթահարել սովորական կենցաղային ակտիվությամբ, առողջ սննդով, քնով, վիտամինների ընդունմամբ, ֆիզիկական ակտիվությամբ:
Նաև խորհուրդ է տրվում ճաշացանկում ավելացնել, այսպես կոչված, երջանկության հորմոնի արտադրությանը նպաստող մթերքներ, ինչպես, օրինակ, դառը շոկոլադ:
Կլիմայի փոփոխության ժամանակ
Արձակուրդը պլանավորելիս հաշվի առեք եղանակին հարմարվելու գործընթացը ոչ միայն հանգստավայրում, այլև վերադառնալուց հետո:
Ծանրաբեռնվածության բաշխում
Եթե անհրաժեշտ է միանգամից դուրս գալ աշխատանքի, ապա առաջին օրը կարելի է անել ոչ հրատապ ու կարևոր աշխատանքներ: Դա ետք է համաձայնեցնել ղեկավարության հետ, որպեսզի հետագայում չհիմնավորված պահանջներ չլինեն:
