Վրաստանի վարչապետ, միլիարդատեր Բիձինա Իվանիշվիլին իր աշխատավարձը բաշխում է կարիքավորների օգնության տարբեր հիմնադրամների: Այս մասին Gruziya Online-ին հայտնել է կառավարության ղեկավարի մամլո ծառայության ներկայացուցիչը:
Նրա խոսքով՝ վարչապետն ամսական ստանում է 4500 լարի (մոտ 2700 դոլար) աշխատավարձ՝ առանց հարկային պահումների:
Կառավարության ղեկավարի մամլո ծառայության ներկայացուցիչը նշել է, որ Իվանիշվիլին վարչապետ դառնալուց ի վեր ոչ մի անգամ չի վերցրել աշխատավարձը, այն փոխանցել է տարբեր հիմնադրամների, ինչպիսիք են Սահմանափակ հնարավորություններով երեխաների օգնության հիմնադրամը, Օնկոլոգիական հիվանդություններով տառապող մարդկանց օգնության հիմնադրամը և այլն:
Այսօր վրացական «Ռեզոնանսի» թերթը գրել է, որ վրացի նախարարները ստանում են տարածաշրջանում ամենաբարձր աշխատավարձը՝ մոտ 4700 դոլար, հարկային պահումները հաշված՝ նրանք ստանում են մոտ 3800 դոլար: Հոդվածում նշվել է, որ Ռուսաստանում և Ադրբեջանում նախարարները ստանում են մոտ 1900 դոլար, Հայաստանում՝ մոտ 740 դոլար, իսկ Բելառուսում՝ 1500 դոլար:
Իվանիշվիլին 2013-ին 5.3 մլրդ դոլար կարողությամբ Forbes-ի ցուցակում զբաղեցրել է 229-րդ տեղը:
