![](https://www.1in.am/assets/uploads/2016/11/campaign-2016-trump.jpeg8-620x412.jpg)
2016 թ. ԱՄՆ նախագահական ընտրությունները զգալիորեն տարբերվում են նախորդ ընտրություններից, քանի որ նախագահի երկու թեկնածուները՝ Հանրապետական կուսակցությունից առաջադրված Դոնալդ Թրամփը և Դեմոկրատական կուսակցությունից առաջադրված Հիլարի Քլինթոնը, չունեն մեծ ժողովրդականություն, ընտրողներից շատերը չեն սիրում Թրամփին, շատերը չեն սիրում Քլինթոնին, և եթե երրորդ կուսակցություններից որևէ մեկը ունենար ուժեղ թեկնածու, սա շատ լավ հնարավորություն էր մարտահրավեր նետելու երկու հիմնական կուսակցություններին: Այսպիսի կարծիք հայտնեց Նյու Յորքի Նորդհեմ համալսարանի գիտաշխատող, քաղաքագիտության դոցենտ Քրիսթինա Գրիերը Միացյալ Նահանգներ ժամանած օտարերկրյա լրագրողների հետ հանդիպմանը ՝ խոսելով նախագահական ընտրությունների գործընթացի, ընտրական եբարդ համակարգի և նախագահի թեկնածուների մասին:
Մեկնաբանելով հարցը, թե իր կարծիքով՝ ո՞վ կհաղթի նախագահական այս ընտրություններում, Գրիերն ասաց. «Քաղաքագիտությունն ասում է, որ հաղթելու է Հիլարի Քլինթոնը, բայց սև աղջիկն իմ մեջ ասում է՝ չգիտեմ, ուստի՝ չգիտեմ, դժվար է ասել»:
Քաղաքագետը, ինչպես շատ ու շատ փորձագետներ Միացյալ Նահանգներում և աշխարհում, խստորեն քննադատում են «ոչ-ավանդական թեկնածու» Դոնալդ Թրամփին՝ իր հայտարարությունների և պահվածքի համար: Թրամփի հայտարարությունը, թե ինքը չի ընդունի ընտրությունների արդյունքները, եթե հաղթի Քլինթոնը, զարմանալի և անընդունելի է քաղաքագիտության դոցենտի համար: Գրիերը հիշեցրեց 2000 թ. նախագահական ընտրապայքարը Ջորջ Բուշ կրտսերի և Ալ Գորի միջև, երբ բնակչության մեծամասնությունը քվեարկեց Ալ Գորի օգտին, բայց ընտրական կոլեգիան նախագահ ընտրեց Ջորջ Բուշին, և Ալ Գորը ընդունեց այդ արդյունքները՝ ասելով, որ դա է պահանջում օրենքն ու սահմանադրությունը:
«Դու չես կարող ասել՝ կսպասենք-կտեսնենք: Եթե մենք չենք քվեարկում քո օգտին, դու պիտի ընդունես դա»:
Գրիերը գեղեցիկ խոսքեր շռայլեց Թրամփի հասցեին՝ ասելով, որ նա ռասիստ է, քսենոֆոբ, էգոիստ, չի մուծել հարկերը. «Նա կքանդի Ամերիկան 10 րոպեում, և դա իր վրա կնստի ընդամենը մեկ դոլար»:
Արամ Սարգսյան