Վաշինգտոնը մտադիր է հակամիջոցներ ձեռնարկել՝ ի պատասխան ԱՄՆ քաղաքական ինստիտուտների դեմ ռուսական կիբերհարձակումների։ Հակամիջոցի ժամանակը կորոշի ԱՄՆ նախագահ՝ հայտարարել է ԱՄՆ պետքարտուղար Ջոն Քերին։ Այս մասին հաղորդում է «Ամերիկայի ձայն» ռադիոկայանը։
«Պատասխանը կլինի նախագահի որոշած ձևով և ժամկետներում, դուք կարող եք այն չտեսնել։ Այնպես որ չի կարելի ասել, որ մենք ոչինչ չենք անում, երբ մեր դեմ հարձակում են գործում, և չենք ձեռնարկում որևէ պատասխան միջոց»,-ասել է ԱՄՆ դիվանագիտության ղեկավարը։
Նրա խոսքով՝ ռուս ցանցահենների գործողություններին պատասխանելու մասին սկզբունքային որոշումը վաղուց է ընդունվել, բայց դեռ քննարկվում է հակամիջոց ձեռնարկելու պահը։ Մինույն ժամանակ Քերին նախազգուշացրել է, որ Ռուսաստանի գործողություններին պատասխանելը կարող է հանգեցնել մի շարք կողմնակի խնդիրներ։
«Սա վտանգավոր է։ Վերջին բանը, ինչ մեզ պետք է, կիբերպատերազմն է, իրավիճակ, որը գնալով ավելի ու ավելի է սրվում, վտանգն աճում է այնքան ժամանակ, քանի դեռ մարդիկ չեն հասկանում, որ այս գործընթացում տեղի է ունենում փոխադարձ ոչնչացում։ Այդ պատճառով պետք է, որ մենք զսպենք հարձակումները և պատասխանատու կերպով վարվենք, մենք բոլորս»,-ասել է Քերին։
