«Ձեր ծախսերի թվերն եմ նայում, շքեղ եք ապրում, շատ շքեղ»,- այսօր Ազգային ժողովում 2017 թվականի բյուջեի նախագծի քննարկման ժամանակ Կենտրոնական բանկի փոխնախագահ Ներսես Երիցյանին դիմեց պատգամավոր Արամ Մանուկյանը: Նա նշեց, որ տարեկան 20 հազար դոլար ԿԲ-ն ծախսում է ամսագրերի, ևս այդքան՝ գրականություն ձեռք բերելու համար: ԿԲ-ն ունի 31 ծառայողական մեքենա, 820 աշխատող՝ 600 հազար դրամ միջին աշխատավարձով:
«Շատ լավ է, թող կրկնակին լինի, բայց երկրի ընդհանուր ֆինանսական վիճակի, պատերազմական վիճակի, 35 տոկոսանոց աղքատության ֆոնին դուք ոնց որ դժոխքի մեջ դրախտ լինեք, անապատի մեջ մի հատ ծաղիկ եք սիրուն, փթթում, լավ ապրում եք»,- ասաց Արամ Մանուկյանը:
Ներսես Երիցյանն ի պատասխան ասաց, որ ԿԲ կառավարման մշակույթը կարող է չափանիշ դառնալ նաև այլ ոլորտներում բարեփոխումներ իրականացնելու համար:«Միայն մասնագիտական գրականությունը, որ մենք կարողանանք մեր վերլուծական ունակությունները կատարելագործենք, որ երեք տարվա կանխատեսումներ իրականացնենք, դրանք մի քանի հազար դոլար արժեն, դրանց տարեկան անդամակցությունը թանկ է: Եվ այդ գրականությունից չօգտվելը նշանակում է դառնալ հետամնաց ու կորցնել մրցունակությունն այլ երկրների Կենտրոնական բանկերի նկատմամբ: Չեմ խոսում զարգացած երկրների մասին, մեր կարգի երկրների Կենտրոնական բանկերի նկատմամբ բավական զսպված են մեր ծախսերը»,- նշեց Ն. Երիցյանը:
«Մի քանի տարի անընդմեջ բանկային համակարգի և ԿԲ միջին աշխատավարձի միջև այդ անջրպետը գնալով խորանում է: Եվ սա արդեն վտանգավոր սահմանի է հասնում, ուղղակի հաշվի առնելով իրավիճակը՝ մենք ձեռնպահ ենք մնացել այդ տարի էլ առաջարկելու աշխատավարձի ֆոնդի ավելացում»,- հավելեց ԿԲ փոխնախագահը:
Մանրմասները՝ տեսանյութում:
