Չորեքշաբթի Ամերիկայի Հայ դատի հանձնախումբի գրասենյակը (ANCA) հայտարարություն է տարծել 2016թ․ ԱՄՆ նախագահական ընտրությունների վերաբերյալ։
Հայտարարության համաձայն՝ յուրաքանչյուր չորս տարին մեկ հանձնախումբը մանրակրկիտ ուսումնասիրում է նախագահի թեկնածուների դիրքորոշումն այն հարցերի շուրջ, որոնք ամենաշատն են հուզում ԱՄՆ հայկական համայնքին։
«Խորհրդակցելով երկու քարոզարշավների ներկայացուցիչների հետ և ծանոթանալով, թե նրանք քաղաքական ինչ առաջնահերթություն են սահմանել ամերիկահայերին հուզող հարցերի շուրջ՝ Ամերիկայի Հայ դատի հանձնախումբը եկել է այն եզրահանգման, որ ո՛չ Հիլարի Քլինթոն-Թիմ Քեյն, ո՛չ Դոնալդ Թրամփ-Մայք Փենս զույգը չի վաստակել մեր աջակցությունը»,- ասվում է հայտարարության մեջ։
Ամերիկայի Հայ դատի հանձնախումբը միևնույն ժամանակ ամերիկահայերին կոչ է անում քվեարկել և ակտիվ մասնակցություն ցուցաբերել ընտրական գործընթացին և աջակցել ANCA-ի թեկնածուներին դաշնային, պետական և տեղական մակարդակներում։
