Փոխվարչապետ, տարածքային կառավարման նախարար Արմեն Գևորգյանն այսօր այցելել է Լոռու մարզի Մեղվահովիտ, Նորաշեն, Սարչապետ, Լեռնահովիտ համայնքներ:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ Լոռու մարզպետ Արթուր Նալբանդյանի ուղեկցությամբ Արմեն Գևորգյանն իր աշխատանքային այցը սկսել է Տաշիրի տարածաշրջանի Մեղվահովիտ համայնքից, որտեղ մարզի առաջնահերթ խնդիրների լուծման ծրագրով կառուցվել է խմելու ջրագիծ` համայնքն ապահովելով շուրջօրյա ջրամատակարարմամբ:
Ջրագիծը կառուցվել է երկու փուլով` առաջնահերթ խնդիրների լուծման առաջին և երկրորդ ծրագրերով հատկացվել է 56 մլն դրամ: Մարզպետարանի պատասխանատուները փոխվարչապետին տեղեկացրել են, որ հետագայում նախատեսվում է ջրագծի հնարավորություններն օգտագործել հարևան երկու համայնքները ևս խմելու ջրով ապահովելու նպատակով:
Նորաշեն համայնքում ամբողջովին վերանորոգվել է մշակույթի տան տանիքը, այս աշխատանքների համար առաջնահերթ խնդիրների լուծման երրորդ ծրագրով հատկացվել էր 6 մլն դրամով:
Այնուհետև Արմեն Գևորգյանը Նորաշեն համայնքից մեկնել է Սարչապետ համայնք: Համայնքի դպրոցի շենքը, որտեղ տեղակայված է նաև մանկապարտեզը, ծրագրի երրորդ և չորրորդ փուլերով հատկացված 25 մլն դրամով ապահովված է ջեռուցման համակարգով, իսկ համայնքին հատկացված 5 մլն դրամ սուբվենցիայով հնարավոր է եղել մանկապարտեզը կահավորել նոր գույքով:
Փոխվարչապետը գոհունակություն է հայտնել շենքային պայմաններից և նշել, որ ինչպես առաջնահերթ խնդիրների լուծման, այնպես էլ այլ ծրագրերով արվում է հնարավորը` համայնքները կրթական բարեկարգ հաստատություններով ապահովելու ուղղությամբ:
Արմեն Գևորգյանը ծանոթացել նաև հիմնանորոգված Նորաշեն-Սարչապետ միջհամայնքային ճանապարհի աշխատանքներին, որոնք իրականացվել են պետբյուջեից հատկացված 157 մլն դրամով:
Լեռնահովիտ համայնքում փոխվարչապետը եղել է նորակառույց համայնքային կենտրոնում: Կենտրոնի հին շենքը հիմնովին քանդվել էր երկրաշարժից հետո, և համայնքապետարանը գործում էր տնակային պայմաններում: Համայնքային կենտրոնի նոր շենքը նույնպես կառուցվել է առաջնահերթ խնդիրների լուծման ծրագրով`երրորդ փուլով հատկացվելով 40 մլն դրամ: Փոխվարչապետին տեղեկացվել է, որ համայնքում տարբեր ծրագրերով ենթակառուցվածքների վերականգման այլ աշխատանքներ ևս իրականացվել են`մասնավորապես, հիմնանորոգվել են խմելու ջրագիծը և մշակույթի տունը:
Լոռու մարզ կատարած այցի ընթացքում փոխվարչապետը հանդիպումներ է ունեցել նաև համայնքների բնակիչների հետ,որոնց բարձրացրած հարցերը հիմնականում վերաբերում էին գյուղտեխնիկայի ձեռք բերմանը և գյուղմթերքի իրացմանը, հակակարկտային կայանների տեղադրմանը, միջհամայնքային ճանապարհների բարեկարգմանը , խմելու ջրի խնդիրներին:
Փոխվարչապետը Տաշիրի և Ստեփանավանի քաղաքապետերի հետ քննարկել է նաև Ստեփանավան և Տաշիր քաղաքներում իրականացվող ծրագրերի ընթացքը, համայնքի ղեկավարների կողմից ներկայացվել են առկա հիմախնդիրները:
