Ընտրական գործընթացների, Նոր ԸՕ-ի շուրջ ընդդիմություն-իշխանություն կոնսենսուսի շուրջ «Առաջին լրատվական»- ը զրուցեց հրապարակախոս Զարուհի Հովհաննիսյանի հետ: Անդրադառնալով դիտարկմանը, որ պահանջվում է հստակ իմանալ ընտրակեղծիք է, թե ոչ հետո նոր դրա վերաբերյալ ահազանգ բարձրանել, հակառակ դեպքում ահազանգողը պատասխանատվության կենթարկվի, Զ. Հովհաննիսյանը ընդգծեց, որ սա անմիջականորեն ճնշում է դիտորդների վրա. «Դիտորդը և ոչ միայն դիտորդը, լիիրավ են ցանկացած խախտում նկատելիս կամ կասկածելիս, որ կատարվում է խախտում, ահազանգել ընտրատեղամասի ղեկավարին, եթե նա չի լսում, ահազանգել իրավապահ մարմիններին: Այսպիսի դրույթը, որը մտցվել է ՔՕ այն հատվածում, որը վերաբերում է ընտրական պրոցեսներին, կարող է լուրջ մտահոգության տեղիք տալ: Մենք՝ դիտորդներս բազմաթիվ վարչական իրավախախտումների միջով, դատական պրոցեսներով անցել ենք, բայց քրեական պատասխանատվության ենթարկելը արդեն չափից ավելի է: Սա բավական լուրջ հարված է դիտորդական առաքելությանը և ազատ քաղաքացիներին, ովքեր կարող են նկատել ընտրախախտումներ, բայց արդեն կվախենան ահազանգել»:
Զ. Հովհաննիսյանը հավաստիացրեց, որ ընտրությունների ժամանակ մինչ այժմ էլ դիտորդների վրա ճնշումներ են գործադրվել. «Դիտորդները ահազանգ էին հնչեցնում, հետո հետ էին կանգնում դրանից: Ի՞նչ է կատարվում ընտրատեղամասում. դիտորդի բարեկամին են գտնում բանակում և սպառնում ծեծել նրան, գտնում են ՔԿՀ-ում նրա բարեկամին, ստիպում են զանգել և ասել, որ հետ վերցնի բողոքը… Մենք գիտենք, թե ինչպես են տեղի ունենում ընտրական գործընթացները»:
Զ. Հովհաննիսյանի կարծիքով՝ ԸՕ-ի շուրջ իշխանություն-ընդդիմություն կոնսենսուսը թափանցիկ ընտրական գործընթացների տապալում է: Հրապարակախոսի դիտարկմամբ՝ ՔՕ նոր դրույթով, որով պատիժներ են սահմանվում կեղծ ընտրախախտումների վերաբերյալ ահազանգերի համար, ավելի է խրախուսվում ընտրակեղծարարությունը և միաժամանակ վախի մթնոլորտ է ստեղծվում հանրության շրջանում: «Հնարավորինս նվազեցվում են այն աչքերի թիվը, որոնք հետևելու են ընտրական գործընթացը»:
Հրապարակախոսի խոսքով՝ Հայաստանում վաղուց ընտրական գործընթացները վերածվել են ֆինանսական միջոցառման. «Ընտրական գործընթացների նախընտրական շրջանում քրեական, ֆինանսական ցանցեր են ստեղծվում, և նաև ընտրությունների օրերին ընտրակաշառքի բուռն գործընթաց է սկսվում: Վաղուց Հայաստանի հանրությանը սովորեցրել են, որ նա չպետք է կատարի ընտրություն, այլ որոշակի ֆինանսական աջակցության դիմաց պետք է ծառայություն մատուցի:
«Այլևս անիմաստ է որևէ ընտրության մասնակցելը, պետք է փնտրել այլ ճանապարհներ՝ ընտրությունների ինստիտուտը վերափոխելու, իմաստափոխելու»,- ընդգծեց Զ. Հովհաննիսյանը:
Մանրամասները՝ տեսանյութում:
