Ադրբեջանը վերսկսել է հետապնդումները կառավարությանը, իշխանություններին քննադատող անձանց և անկախ խմբավորումների նկատմամբ՝ ասվում է Human Rights Watch իրավապաշտպան կազմակերպության զեկույցում, որը հրապարակվել է այսօր։ Զեկույցը բաղկացած է 75 էջից։
Զեկույցում նշվում է, որ Եվրամիությունը և միջազգային ֆինանսական համակարգերը հնարավորություն ունեն պահանջել, որ այս երկրում անցկացվեն բարեփոխումներ մարդու իրավունքների ոլորտում, քանի որ Ադրբեջանը փնտրում է ֆինանսական համագործակցություն՝ տնտեսական ակնումն ինչ-որ կերպ լրացնելու համար։
Իրավապաշտպան կազմակերպությունը փաստում է, որ 2016թ․ երկրի իշխանությունները քաղաքականացված, կեղծ մեղադրանքներ են առաջադրել մի շարք լրագրողների, ակտիվիստների և այլախոհների նկատմամբ, որոնցից շատերը շարունակում են մնալ բանտերում։
«Կառավարությունն անկախ խմբավորումների գործունեությունը կաթվածահար անելու համար ստեղծել է իրավական և քաղաքական շրջանակներ։ Փաստաբանները, որոնք ցանկացել են պաշտպանել այդ մարդկանց, բախվել են վրեժի հետ, իսկ որոշ դեպքերում անգամ հեռացվել են աշխատանքից։ Չնայած այն հանգամանքին, որ տարեսկզբին իշխանություններն ազատ են արձակել որոշ իրավապաշտպանների և այլախոհների, մեծ մասը շարունակում է մնալ անազատության մեջ»,-ասվում է զեկույցում։
Հարավային Կովկասի հարցերով Human Rights Watch-ի ղեկավար Գիորգի Գոգիայի խոսքով՝ տարեսկզբին, երբ Ադրբեջանում աազատ արձակվեցին մի քանի իրավապաշտպաններ, հույս արթնացավ, որ այդ երկրում որոշակի դրական փոխոխություններ կլինեն մարդու իրավունքների ոլորտում, սակայն լավատեսությունը շատ շուտ չքացավ։
Նշենք, որ զեկույցը կազմելուց առաջ իրավապաշտպան կազմակերպությունը հարցազրույցներ է վերցրել ավելի քան 90 մարդուց, որոնց թվում են իրավապաշտպաններ, լրագրողներ, քաղաքական ակտիվիստներ։
HRW-ն կոչ է անում ԱՄՆ-ին ու Եվրամիությունը արտոնագրից զրկել Ադրբեջանի բարձրաստիճան պաշտոնյաներին, որոնք պատասխանատու են իրավապաշտպանների, լրագրողների ու ընդդիմադիրների նկատմամբ շարունակվող բռնաճնշումների համար։
