Գերմանիան դիտարկում է Ռուսաստանի դեմ նոր պատժամիջոցներ սահմանելու հնարավորությունը՝ Սիրիայում իրավիճակի պատճառով։ Այս մասին Süddeutsche Zeitung-ին տված հարցազրույցում հաստատել է Բունդեսթագի՝ արտաքին գործերի կոմիտեի ղեկավար Նորբերտ Ռետգենը։
Պատգամավորի խոսքով՝ նվազագույն բանը, որ ստեղծված իրավիճակում կարող է անել Եվրոպան, Հալեպի ռազմական գործողությունները ռազմական հանցագործություն անվանելն է։ «Ռազմական հանցագործությունների հանդեպ արձագանքի բացակայությունը սկանդալ է առաջացնում»,- հավելել է նա։
Ռետգենը խոստովանել է, որ պատժամիջոցներն անմիջապես չեն ազդի Ռուսաստանի վրա, սակայն նրա կարծիքով՝ երկարաժամկետ հեռանկարում կազդեն Մոսկվայի քաղաքականության վրա։ Խորհրդարանական կոմիտեի ղեկավարը քննադատել է ԵՄ մյուս երկրներին այն բանի համար, որ նրանք հրաժարվում են իրերն իրենց անուններով կոչել և վախենում են գնալ ՌԴ-ի դեմ նոր սահմանափակումների ներմուծման։
Հոկտեմբերի 6-ին The Wall Street Journal-ը՝ հղում անելով աղբյուրին, հայտնել էր, որ Գերմանիան կարող է հանդես գալ Ռուսաստանի դեմ ԵՄ նոր պատժամիջոցների սահմանման նախաձեռնությամբ՝ ի պատասխան Սիրիայում նրա գործունեության։ ԶԼՄ-ների տվյալներով՝ այս հարցի քննարկումը գերմանական իշխանական կառույցներում գտնվում է վաղ փուլում։
ՌԴ նախագահի մամլո քարտուղար Դմիտրի Պեսկովը, մեկնաբանելով այդ տեղեկությունը, նշել էր, որ Մոսկվան հավելյալ տնտեսական սահմանափակումների ներմուծման պատճառ չի տեսնում։ «Եկեք չմոռանանք, որ Ռուսաստանը միակ երկիրն է, որի զինված ուժերը միջազգային իրավունքի տեսանկյունից օրինական կերպով են գտնվում Սիրիայի Արաբական Հանրապետությունում»։
