ՀՀ ԱԺ նախագահ Գալուստ Սահակյանը սեպտեմբերի 22-ին ընդունել է Ֆրանսիայի Հանրապետության Սենատի անդամ Լյուկ Կարվունասի գլխավորած պատվիրակությանը:
Ինչպես հայտնում են ԱԺ տեղեկատվության և հասարակայնության հետ կապերի վարչությունից, ողջունելով հյուրերին Ազգային ժողովում՝ Գալուստ Սահակյանը կարևորել է նրանց այցը Հայաստան մեր երկրի անկախության 25-ամյակի կապակցությամբ:
Խորհրդարանի նախագահը շնորհակալություն է հայտնել բարեկամ Ֆրանսիային` Հայաստանի համար կենսական նշանակություն ունեցող հարցերում մշտապես աջակցելու համար:
Գալուստ Սահակյանը, անդրադառնալով Լեռնային Ղարաբաղի հիմնախնդրին, կարևորել է պատվիրակության՝ Լեռնային Ղարաբաղ կատարած այցը: Այս համատեքստում Ազգային ժողովի նախագահը բարձր է գնահատել այս տարվա ապրիլին Ադրբեջանի կողմից սանձազերծված լայնածավալ ռազմական գործողությունների վերաբերյալ ֆրանսիացի խորհրդարանականների դատապարտող արձագանքը:
Խորհրդարանի ղեկավարը, դատապարտելով Փարիզում և Նիսում, ինչպես նաև մինչ այդ տեղի ունեցած դաժան ահաբեկչական գործողությունները, հավաստիացրել է, որ Հայաստանը մշտապես բարեկամ Ֆրանսիայի կողքին է:
Գալուստ Սահակյանը, անուրանալի համարելով Հայոց ցեղասպանության միջազգային ճանաչման և դատապարտման գործում Ֆրանսիայի ներդրումը, նշել է, որ 2001թ. ընդունված Հայոց ցեղասպանության ճանաչման մասին օրենքը կատարյալ կդառնա, եթե ուղեկցվի Ցեղասպանության ժխտման համար պատասխանատվություն սահմանող օրենքով: Ազգային ժողովի նախագահը հույս է հայտնել, որ Ֆրանսիայի խորհրդարանը հետևողական կլինի նոր օրինագծի ներկայացման և ընդունման հարցում՝ հաշվի առնելով նաև Ֆրանսիայի նախագահ Ֆրանսուա Օլանդի հանձնառությունը:
Խորհրդարանի ղեկավարը համոզմունք է հայտնել, որ Լյուկ Կարվունասը կշարունակի ջանքերը Հայաստանի և Ֆրանսիայի միջև համագործակցության առավել սերտացման և ընդլայնման ուղղությամբ:
Ֆրանսիայի Հանրապետության Սենատի անդամ Լյուկ Կարվունասը, շնորհակալություն հայտնելով ՀՀ ԱԺ նախագահին ջերմ ընդունելության համար, շնորհավորել է Հայաստանի Հանրապետության անկախության 25-ամյակի կապակցությամբ: Նա ՀՀ ԱԺ նախագահ Գալուստ Սահակյանին է փոխանցել Ֆրանսիայի Ազգային ժողովի նախագահ Կլոդ Բարտոլոյի և Ֆրանսիա-Հայաստան բարեկամական խմբի ղեկավար Բրյունո լը Ռուի ջերմ ողջույնները:
Լյուկ Կարվունասը, անդրադառնալով այս տարվա ապրիլյան իրադարձություններին, նույնպես կարևորել է իրենց այցն Արցախ և հանդիպումները ԼՂՀ նախագահի ու Ազգային ժողովի նախագահի հետ: Նա նշել է, որ հանդիպումների ընթացքում իրենք Ֆրանսիայի համերաշխությունն են փոխանցել Լեռնային Ղարաբաղի ժողովրդին՝ Ադրբեջանի կողմից խախտված հրադադարի հետևանքով տեղի ունեցած իրադարձություների կապակցությամբ: Լյուկ Կարվունասը նշել է, որ ինքն արել է հնարավորը՝ ապրիլյան քառօրյա պատերազմը Ֆրանսիայի կառավարությանը ճշգրիտ ներկայացնելու համար:
Անդրադառնալով Հայոց ցեղասպանության ճանաչման հարցին՝ ֆրանսիացի խորհրդարանականը նշել է, որ արվում է ամենը` ընդունելու օրենք, որը կամբողջացնի Հայոց ցեղասպանության ճանաչումն ու կքրեականացնի ժխտումը:
Հանդիպման ընթացքում անդրադարձ է եղել երկկողմ հետաքրքրություն ներկայացնող այլ հարցերի:
