Ավելի քան 220 հազար աֆրիկացիներ ծրագրում են հատել Միջերկրական ծովը՝ Եվրոպա ուղևորվելու համար։ Այս մասին հայտարարել է Եվրահանձնաժողովի ղեկավար Ժան-Կլոդ Յունկերը՝ փոխանցում է RIA Novosti-ն։
«Լիբիայի և Իտալիայի միջև միջերկրածովյան սահմանին կան 225 հազար փախստականներ, որոնք սպասում են Միջերկրականի հատմանը, դա անհնարին է։ …Մենք՝ հանձնաժողովը, առաջարկել ենք ներառել Աֆրիկան ներդրումային պլան»,- ասել է Յունկերը՝ ելույթ ունենալով Եվրոպական տնտեսական և սոցիալական կոմիտեի հանդիպմանը։
Նա նշել է, որ Եվրահանձնաժողովը մտադիր է գործարկել «Յունկերի պլանը» Աֆրիկայի համար։ «Եթե անդամ երկրները դրան մասնակցեն, իսկ դա դեռևս ակնհայտ չէ, այն կարող է մոբիլիզացնել 88 մլրդ եվրո ներդրում Աֆրիայի համար»,- հայտարարել է Եվրահանձնաժողովի նախագահը։
Յունկերը նախազգուշացրել է, որ եթե Եվրոպան ներդրում չանի Աֆրիկայում, Աֆրիկան կգնա Եվրոպա։ «Այդ հեռանկարն ինձ չի վախեցնում, սակայն ավելի խելամիտ կլինի նրանց ավելի երջանիկ դարձնել այնտեղ, որտեղ նրանք ապրում են, քան հրավիրել նրանց հատելու Միջերկրական ծովը՝ հայտնվելու համար Եվրոպայում ողբերգական վիճակում»,- ասել է Յունկերը։
Եվրոպան վերապրում է երկրորդ համաշխարհայինից ի վեր ամենալուրջ միգրացիոն ճգաժամը։ ԵՄ Frontex գործակալության տվյալներով՝ 2015 թվականին ԵՄ է ժամանել 1.8 մլն ներգաղթյալ։
