Քաղաքական վերլուծաբան Լևոն Մարգարյանը «Առաջին լրատվական»-ի հետ զրույցում կարծիք հայտնեց, որ Հայաստանը անընդհատ է կանգնելու անկախությունը վերահաստատելու խնդրի առաջ, քանի որ մենք ապրում ենք այնպիսի տարածաշրջանում, որ «հանգիստ կյանք չենք ունենալու»:
Նրա խոսքով՝ անկախության վերահաստատումը, սակայն, պետք է լինի ոչ թե տոնից տոն, այլ ամենօրյա աշխատանք: Մեր զրուցակիցը կարծում է, որ այս անգամ պարզապես այդ գիտակցումն ավելի սրված է, որովհետև տեղի ունեցան մեր պետականությանը սպառնացող արտաքին (ապրիլյան դեպքերը) և ներքին (հուլիսյան իրադարձությունները) վտանգներ. «Այս վերջին դեպքերը կարծես արթնացրին մեզ և անընդհատ ստիպում են խոսել այդ մասին»:
Ինչպես նկատեց քաղաքական վերլուծաբանը՝ «այժմ մենք ոչ այնքան կարիք ունենք անկախության վերահաստատման, որքան վերանայման: Եվ չնայած Հայաստանում նկատելի ապատիկ, դեպրեսիվ մթնոլորտին, ամեն դեպքում այս քննարկումները մեզ բերելու են այն հանգրվանին, որի դեպքում պիտի զատենք կարևոր արժեքները անկարևորներից: Այս առումով ես դրական եմ գնահատում այդ քննարկումները և չեմ կարծում, թե ապոկալիպսիկ վիճակ կա, որպեսզի մենք հիմա խիստ անհանգստանանք»:
