Ստամբուլի հայկական «Ակօս» թերթի փոխանցմամբ՝ Ստամբուլի Ուսքյուդար (Սկյութար) շրջանում գտնվող հայկական դպրոցի պատին կրկին հայտնվել է ռասիստական գրառում: Ընդ որում՝ այն հայտնաբերվել է Թուրքիայում 2016-2017 ուսումնական տարվա առաջին օրը՝ սեպտեմբերի 18-ի գիշերը:
Անհայտ անձինք դպրոցի պատին գրել են՝ «Կեցցե՛ թուրքական ռասան»: Ընդգծվում է, որ դա այս տարի նմանատիպ առաջին դեպքը չէ:
Նախորդ դեպքը գրանցվել էր 2016 թվականի հունվարին, երբ դպրոցի պատին հայտնվել էր «Տառապանքնե՛ր հայերին» գրառումը: Այն ժամանակ դա համընկել էր «Ակօսի» նախկին խմբագրապետ Հրանտ Դինքի սպանության 9-րդ տարելիցին:
