ԱՄՆ պետքարտուղար Ջոն Քերին կարծիք է հայտնել, որ Սիրիայում ռուս-ամերիկյան համակարգման կենտրոնի ստեղծման հարցը ծայրաստիճան կարևոր է։ Այս մասին հայտնում է Associated Press-ը։
Պետքարտուղարն ընդգծել է, որ այդ կենտրոնի ստեղծումը թույլ կտա խուսափել Սիրիայի տարածքում ավիահարվածների ժամանակ սխալներից։
Նա նաև հավելել է, որ կենտրոնի գործունեությունը «թույլ կտա կանխել այն սարսափը, որը տեղի է ունեցել սեպտեմբերի 18-ին»։
«Մենք խոստովանում ենք սխալը և ցավում դրա համար։ Սակայն նման բաներ տեղի են ունենում, երբ ընթանում են զինված հակամարտություններ»,- նշել է Քերին։
Պետքարտուղարը կոչ է արել Ռուսաստանին՝ ազդել Սիրիայի նախագահ Բաշար Ասադի վրա, որպեսզի նա դադարեցնի ավիահարվածները չափավոր ընդդիմության ուժերին և ապահովի երկրի պաշարված շրջաններ մարդասիրական օգնության հասանելիությունը։
