Հարավկորեացի ակտիվիստները հելիումով լցված փուչիկներով Հյուսիսային Կորեա են արձակել տասնյակ հազարավոր թռուցիկներ, որոնցում դատապարտվում են Փխենյանի քաղաքականությունն ու վերջերս անցկացված միջուկային փորձարկումը։ Այս մասին հայտնում է France Presse գործակալությունը։
Թռուցիկներում ակտիվիստները դատապարտում են Հյուսիսային Կորեայի առաջնորդ Կիմ Չեն Ինին այն բանի համար, որ նա միջուկային զենքը նախընտրում է ժողովրդի բարեկեցությունից։
Սկզբում նախատեսվել էր արձակել մոտ 150 հազար թռուցիկ, սակայն ուժեղ քամու պատճառով դրանց թիվը կրկնակի կրճատվել է։ Ակտիվիստներից մեկի խոսքով՝ իրենք դա արել են, որպեսզի Հյուսիսային Կորեայում 20 մլն քաղցած մարդկանց պատմեն ճշմարտությունը։
«Ներկայում, երբ հարյուր հազարավոր մարդիկ տառապում են սարսափելի ջրհեղեղի հետևանքներից, Կիմ Չեն Ինը ևս մեկ միջուկային փորձարկում է անցկացնում»,- ասել է ակտիվիստների ներկայացուցիչը։
