«Առաջին լրատվական»- ի հետ զրույցում, անդրադառնալով Հովիկ Աբրահամյանի հրաժարականին, նոր վարչապետի նշանակմանը և հարցին, թե անձերին փոխելով՝ արդյո՞ք հնարավոր կլինի վիճակ բեկել, ԱԺ ՀՀԿ խմբակցության պատգամավոր Լևոն Մարտիրոսյանը նշեց, որ այս փոփոխությունները, նոր սկիզբը պարտադրված են նոր Սահմանադրությամբ, ապրիլյան պատերազմը և ամառվա իրադարձությունները հետաձգեցին դրանք:
Լ. Մարտիրոսյանը հիշեցրեց, որ Հովիկ Աբրահամյանն ինքը նշեց, որ չի կարողանում ցանկալի արդյունքներ ապահովել: «Մարդիկ միշտ էլ պետք է փոխվեն, hավերժ պաշտոնյաներ չկան: Համակարգային փոփոխություններ են պետք, և դրանք բխում են Սահմանադրությունից, հատկապես տնտեսության մեջ պետք է լուրջ փոփոխություններ իրականացվեն»,- ընդգծեց ՀՀԿ խմբակցության պատգամավորը:
Նրա խոսքով՝ Կարեն Կարապետյանի նշանակումը վարչապետի պաշտոնում չափազանց դրական է ընդունվել և’ քաղաքական դաշտում, և’ հասարակոության լայն շրջանակների կողմից:
Լ. Մարտիրոսյանի կարծիքով՝ Հայաստանը պրոֆեսիոնալ կադրերի պահանջարկ ունի, այդպիսի կադրերի կարիք միշտ էլ կա անգամ զարգացած երկրներում: Նա հավաստիացրեց, որ կադրերի համալրման հարցում Սփյուռքի ներուժը ևս կօգտագործվի:
«Կառավարությունը պետք է ձևավորվի՝ հենվելով ԱԺ-ում եղած մեծամասնության վրա, պարտադիր չէ, որ այս կամ այն կուսակցության անդամ լինեն կամ ընդհանրապես կուսակցական լինեն, հաշվի է առնվելու պրոֆեսիոնալիզմը»,- նշեց Լ. Մարտիրոսյանը և հույս հայտնեց, որ նորանշանակ վարչապետ Կարեն Կարապետյանը լավագույնս կկատարի իր պարտականությունները: «Նոր վարչապետը քաղաքական մարդ է, նա իր նորարար աշխատելաոճով, իր փորձով ու գիտելիքներով և արտակարգ մարդկային տվյալներով միայն կնպաստի այն խնդիրների լուծմանը, որոնց առջև կանգնած են ինքը՝ որպես վարչապետ, և նոր ձևավորվելիք կառավարությունը»:
Լևոն Մարտիրոսյանի հետ զրուցեցինք նաև ՏԻՄ ընտրություների շուրջ: Լուրեր են շրջանառվում այն մասին, որ ՀՀԿ-ն հետապնդումների է ենթարկում տարբեր թեկնածուների, սպառնում են՝ պարտադրելով ինքանբացարկ հայտարարել. ԲՀԿ խմբակցության ղեկավարը ևս փաստում է այն մասին, որ իրենց թեկնածուների վրա ճնշումներ են գործադրվել: Անդրադառնալով այս դիտարկմանը՝ Լևոն Մարտիրոսյանը նշեց. «Իշխանությունը կարիք չունի ընդդիմադիր դաշտի կամ առանձին գործիչների վրա ճնշումներ գործադրելու: Այս պահին, առավել քան երբևէ, կառավարող ուժը իրեն վստահ է զգում: Ցավոք սրտի, հակառակ դաշտում չկա որևէ ուժ, որից իշխանությունը պիտի վախենա: Սա երկրի և հասարակության համար խնդիր է: Առանց ինստիտուցիոնալ հիմքերի վրա դրված ընդդիմության չի կարող լինել ժողովրդավարություն, իսկ առանց ժողովրդավարության երկիրն ապագա չունի: Մենք այլընտրանք չունենք, պետք է լինենք ժողովրդավար»:
Մանրամասները՝ տեսանյութում:
