Եկատերինբուրգում ձերբակալվել է սպանված քրեական հեղինակություն Ասլան Ուսոյանի (Դեդ Հասանի) զարմիկ Թիմուր Միրզոևը, ով հայտնի է Թիմուր Սվերդլովսկի մականունով: Այս մասին հայտնում է «Նովի Ռեգիոն» գործակալությունը:
Միրզոևի և քրեական աշխարհի ևս 8 ներկայացուցիչների ձերբակալությունը կատարվել է Մոսկովյան փողոցում գտնվող «Արևելյան խոհանոց» սրճարանում: Ձերբակալվածների շարքում են Լևան Ակոևը (Լևա), Պաատա Լանգվիլավան (Պատա), Շալվա Ակոևը (Շալվա), Նասիմի Կազիմահոմեդովը, Յուրի Շավիլովը, Իլյամ Օսմանովը և Զուրաբ Կևկիձեն:
Իրավապահ մարմինների տեղեկություններով՝ «օրենքով գողերը» հավաք էին կազմակերպել՝ քննարկելու վերջերս գողական կարգավիճակ ստացած Օլեգ Գերասիմովիչի վարքը: Վերջինս հայտնի է Մումու և Սլուցկի մականուններով: Վերջին ժամանակաշրջանում Գերասիմովիչը փորձում է գործունեություն ծավալել Սվերդլովի շրջանում: 2013-ի մայիսին նա ազատազրկման կարճատև ժամկետի է դատապարտվել և պետք է ազատ արձակվի աշնանը:
Ինչպես հայտնի է դարձել լրագրողներին՝ հավաքից առաջ Միրզոևը գնացել է վանքերից մեկը, որի հովվապետը նրա անձնական խոստովանահայրն է: Այդ հոգևորականը նախկինում 12 տարի բանտում է անցկացրել սպանության համար:
2013-ի հունվարին Դեդ Հասանը սպանվեց: Նրա կլանը հայտնվել է միանգամից մի քանի ազդեցիկ անդամների, այդ թվում՝ Միրզոևի կառավարման ներքո:
