«Բանկային համակարգի ինտեգրացիան հայաստանյան տնտեսությանը դեռևս բավականին թույլ է, շուկայում գրեթե չեն հայտնվում նոր ձեռնարկատերեր, ինչն էլ դժվարություններ է ստեղծում բանկերի համար»,- այսօր լրագրողների հետ հանդիպման ժամանակ կարծիք հայտնեց «ՎՏԲ-Հայաստան բանկ» ՓԲԸ գլխավոր տնօրեն, տնօրինության նախագահ Վալերի Օվսյաննիկովը։
Նրա խոսքերով, այս ամենի պատճառը իրական սեկտորի զարգացման դինամիկայի բացակայությունն է և բիզնեսի ոչ բավարար թափանցիկությունը։ Օվսյաննիկովը նաև նկատեց, որ հայաստանյան բանկային համակարգում ուժեղ մրցակցությունն իրականացվում է ոչ թե ի հաշիվ որակի, այլ ի հաշիվ տոկոսադրույքների, որոնք էլ հաճախորդներին ստիպում են այս բանկից գնալ մյուս բանկ, որը, սակայն, վատ է թե՛ բանկի, թե՛ հաճախորդի համար։
Օվսյաննիկովը նաև նկատեց, որ մեծ և փոքր բիզնեսի թափանցիկության բացակայության պատճառով բանկերը չեն կարողանում վարկավորել փոքր բիզնեսը և հաշվի առնել բոլոր ռիսկերը։
«ՎՏԲ-Հայաստան բանկը» նաև իրականացնում է թոշակառուների սպասարկում և ներկայումս սպասարկում է մոտ 50 հազար թոշակառուների՝ իրականացնելով կենսաթոշակային վճարումների մոտ 10 տոկոսը։ 12 հազար թոշակառու արդեն օգտվում է քարտային համակարգից։ Օվսյաննիկովը նկատեց, որ քարտային համակարգին անցումը որոշակի դժվարություններ է ստեղծել, բայց իրենք նպատակ ունեն ընդլայնելու քարտերով օգտվող թոշակառուների թիվը։