Առնվազն 2,6 մլրդ մարդ, այսինքն՝ մոլորակի բնակիչների մեկ երրորդից ավելին, ապրում է Աֆրիկայի և Ասիա-խաղաղօվկիանոսյան տարածաշրջանի այն հատվածներում, որտեղ Զիկա վիրուսը կարող է լայնորեն տարածվել: Այս մասին ասվում է բրիտանական Lancet Infectious Diseases ամսագրում հրապարակված բժշկական հետազոտության մեջ: Նրանցից 1,8 մլրդ-ը բաժին է ընկնում 5 երկրի՝ Հնդկաստանին, Չինաստանին, Ինդոնեզիային, Ֆիլիպիններին և Թաիլանդին:
Հետազոտության տվյալներով՝ միայն Հնդկաստանում Զիկա վիրուսով վարակման ռիսկի է ենթակա 1,2 մլրդ մարդ, Չինաստանում՝ 242 մլն մարդ, Ինդոնեզիայում՝ 197 մլն, Ֆիլիպիններում՝ 70 մլն, Թաիլանդում՝ 59 մլն մարդ:
Գիտնականների խոսքով՝ այդ մարդիկ ապրում են վիրուսի հարուցիչ մոծակների համար բարենպաստ կլիմայական պայմաններում:
Զիկա վիրուսի հարուցիչը Aedes aegypti մոծակն է:
Տեղեկություններ կան, որ հղիության ընթացքում վիրուսով վարակումը երեխայի մոտ առաջացնում է միկրոցեֆալիա՝ բնածին արատ, որի հետևանքով գանգը զգալիորեն փոքր է լինում: Այն ուղեկցվում է մտավոր հետամնացությամբ, նևրոտիկ շեղումներով, լսողության ու տեսողության խանգարումներով:
