ԱՄՆ-ն ու Կուբան օգոստոսի 31-ին վերսկսել են կոմերցիոն ավիահաղորդակցությունը։ Ամերիկյան Jetblue Airways ընկերության ինքնաթիռը մեկնել է Ֆլորիդա նահանգի Ֆորտ Լոդերդեյլ քաղաքից և մոտ մեկ ժամ անց վայրէջք կատարել Կուբայի Սանտա Կլարա քաղաքում։ Այս մասին հայտնում է DW գործակալությունը։
Վերջին կանոնավոր չվերթը երկու երկրների միջև կատարվել էր 1961 թվականին։ 1959 թվականին կուբայական հեղափոխությունից հետո ամերիկյան իշխանությունները Կուբայի դեմ առևտրային էմբարգո էին սահմանել, իսկ 1963 թվականին երկրները խզել էին դիվանագիտական հարաբերությունները։
2014 թվականի ավարտին Վաշինգտոնն ու Հավանան հայտարարել էին միմյանց հետ կապերի աստիճանական վերականգնման մեկնարկի մասին։ Մասնավորապես, ԱՄՆ-ն ու Կուբան վերականգնել են դիվանագիտական հարաբերությունները։ Բացի այդ, ԱՄՆ-ը թուլացրել է Կուբայի դեմ պատժամիջոցների մի մասը՝ չնայած առևտրային էմբարգոն մնում է ուժի մեջ։
«Սա դրական քայլ է երկու երկրների միջև դիվանագիտական հարաբերությունների նորմալացմանն ընդառաջ։ Մենք ողջունում ենք առաջին կանոնավոր չվերթն ԱՄՆ-ից Կուբա։ Անկասկած, այն պատմական է»,- ճեպազրույցի ժամանակ հայտարարել է Պետդեպի պաշտոնական ներկայացուցիչ Ջոն Կիրբին։
