«Ինձ թվում էր՝ գոնե հուլիսյան դեպքերից հետո, երկիրը սոցիալ-տնտեսական աղետի հասցնելուց, ներքաղաքական դաշտը ապականելուց հետո, աղքատության, արտագաղթի, իշխանության նկատմամբ հանրության նման ագրեսիայի պայմաններում իշխանությունը պետք է հետևություն աներ և վերանայեր իր գործելաոճը»,- «Առաջին լրատվական»-ի հետ զրույցում ասաց «Բարգավաճ Հայաստան» կուսակցության նախագահ Նաիրա Զոհրաբյանը՝ անդրադառնալով առաջիկա ՏԻՄ ընտրություններում ընդդիմության կողմից առաջադրված թեկնածուների նատմամբ իշխանության կողմից արդեն իսկ գործադրվող ճնշումներին:
Մեր զրուցակցի խոսքով՝ իշխանության այս գործելակերպը, ցավոք, ոչ միայն չի փոխվել, այլև ավելի այլանդակ բնույթ է ստացել:
Ինչ վերաբերում է Մասիսում ԲՀԿ կողմից առաջադրված թեկնածուի՝ Կարապետ Օհանյանի անսպասելի ինքնաբացարկին՝ կուսակցության նախագահը նկատեց, որ տեղի է ունեցել տգեղ ու անբարո գործարք. «Կարապետ Օհանյանը նեղ շրջանակում խոստովանել է, որ ՀՀԿ թեկնածու Դավիթ Համբարձումյանը իր կրտսեր որդուն խոստացել է փոխքաղաքապետի պաշտոնը, եթե նրա հայրը հանի թեկնածությունը: Այսինքն՝ Կարապետ Օհանյանը ուղղակիորեն վաճառվել է, և այսօր ողջ Մասիսը թքում է Կարապետ Օհանյանի երեսին: Այնպես որ՝ որպես կուսակցություն, մենք ևս մտորելու խնդիր ունենք»:
Ինչ վերաբերում է Գյումրիում տիրող իրավիճակին, ապա ԲՀԿ ղեկավարը ասաց, որ այս պահին իրենք արտառոց ճնշումներ չեն նկատում՝ չբացառելով դրանց հնարավորությունը. «Պետք է անընդհատ զգոն լինել՝ չմոռանալով, թե ինչ մրցակցի հետ գործ ունես»:
Նրա խոսքով՝ իշխանության հիմնական թիրախը «Բարգավաճ Հայաստանն է», իսկ ընդդիմադիր կուսակցությունների գերակշիռ մեծամասնության համար իշխանությունը ստեղծել է «ջերմոցային պայմաններ»:
ՏԻՄ ընտրություններին ընդդիմադիր քաղաքական ուժերի կողմից դաշինքի ստեղծմանը խանգարեցին նրանց ամբիցիաները՝ կարծում է Նաիրա Զոհրաբյանը. «Եթե ընդդիմադիր քաղաքական ուժերը միավորվեին և միասնական քաղաքական օրակարգ ձևավորեին, ապա իշխանությունն իրեն չէր պահի այսպես «բեսպարդոննո» և «բեսպրեդել»: Այստեղ մեծ մեղավորություն ունեն նաև ընդդիմադիր ուժերը»:
Այնուամենայնիվ, Նաիրա Զոհրաբյանը համարում է, որ Գյումրիում Սամվել Բալասանյանը հանդես չեկավ ՀՀԿ դրոշի տակ, որովհետև իշխանությունը ինքնավստահ չէ և գիտի, որ «ՀՀԿ դրոշի տակ ամեն ինչ դատապարտված է պարտության»:
