Իտալացի ոստիկանները հայտարարել են, որ պատրաստ են օգնություն ցուցաբերել Ռուսաստանի հատուկ ծառայություններին «օրենքով գող» Ասլան Ուսոյանի (Դեդ Հասան) սպանության հետաքննության հարցում՝ հաղորդում է Rosbalt-ը:
Իտալացի ոստիկանների տրամադրության տակ է երկու «օրենքով գողերի» խոսակցության ձայնագրությունը, որոնք քննարկում են Ուսոյանի վրա հարձակումը:
Իրավապահ մարմինների աղբյուրի խոսքերով՝ ձայնագրությունն արվել է 2012թ. սեպտեմբերի 18-ին՝ Հռոմում, իտալական ոստիկանության կողմից:
Այդ օրը Հռոմում «օրենքով գող» Մերաբ Ջանգվելաձեն (Մերաբ Սուխումսկի) հավաք է անցկացրել: Միջոցառման ժամանակ տեղի է ունեցել Մերաբի և մեկ այլ «օրենքով գող» Տարիել Օնիանիի (Տարո) հեռախոսազրույցը, որը գտնվում է ռուսական բանտում:
Ջանգվելաձեն Օնիանիին հաղորդել է, որ մաֆիան որոշում է՝ ինչպես վարվել Ուսոյանի հետ, որի հետ նրանք շարունակում են տարաձայնություններ ունենալ: Ձայնագրության համաձայն՝ Տարոն կարճ պատասխան է տվել՝ «Վերացրե՛ք նրան, և բոլոր խնդիրները կվերանան»:
Իտալիայում ենթադրում են, որ հենց այս հեռախոսազրույցից հետո՝ հավաքի ժամանակ, Դեդ Հասանին սպանելու որոշում է կայացվել: 2013թ. հունվարին ոստիկանները ձայնագրել են Տարոյի և Մերաբի մեկ այլ հեռախոսազրույց, որի ժամանակ նրանք քննարկում են արդեն տեղի ունեցած սպանությունը:
Հաղորդվում է, որ Ռուսաստանի ՆԳՆ-ը սկեպտիկորեն է վերաբերվում իտալական ոստիկանության կողմից արված ձայնագրություններին:
«Նրանք հետաքննությանը չեն օգնի, իսկ այն շատ բարդ է առաջ ընթանում: Չի բացառվում, որ մոտակա ժամանակներս Ուսոյանի սպանության գործի հետաքննությունը կդադարեցվի՝ «մեղավոր անձին քրեական պատասխանատվության ենթարկելու անհնարին լինելու պատճառով» ձևակերպմամբ»,- ասել է իրավապահ մարմինների աղբյուրը:
Հիշեցնենք, որ 75-ամյա Ասլան Ուսոյանը սպանվել է 2013թ. հունվարի 16-ին՝ Մոսկվայի կենտրոնում:
