Արդեն չորս օր է, ինչ ազատամարտիկ Խաչիկ Ավետիսյանն Ազատության հրապարակում նստած է հացադուլի: Նա «Առաջին լրատվական»-ի հետ զրույցում ասաց, որ հացադուլը կշարունակի այնքան ժամանակ, մինչև չլուծվեն ազատամարտիկների խնդիրները. «Ես չեմ վստահում կառավարությանը, դրա համար էլ իմ պահանջները մի քանի օրից կներկայացնեմ իմ ընկերներին»:
Մեզ հետ զրույցում ազատամարտիկ Կարեն Մելիքբեկյանն էլ հավելեց, որ երկու օրից, ըստ նախնական պայմանավորվածության, կհանդիպեն վարչապետի հետ. «Վարչապետը մեզ կներկայացնի իր առաջարկները, եթե ինչ-որ բան չհամապատասխանի մեր շահերին, մենք արդեն կմտածենք, թե ինչպես շարունակենք պայքարը»:
Նա ասաց, որ մի քանի տղաներով օրենքի նոր նախագծի վրա են աշխատում, որպեսզի ընդունվի կամավոր ազատամարտիկի մասին օրենք. «Բոլոր նրանք, ովքեր կամավոր կռվել են, պիտի օրենքով ունենան արտոնություններ, ոչ թե մեկը գնա բժշկի և գումար վերցնեն` հաշվի չառնելով, որ դիմացինը կռված տղա է»:
Նշենք, որ արդեն չորս գիշեր է, ինչ մի խումբ ազատամարտիկներ մնում են հացադուլ հայտարարած իրենց ընկերոջ կողքին: Նրանց մեջ կան անգամ մարզերից եկած ազատամարտիկներ:
