Այսօր Եվրամիություն-Հայաստան Ասոցացման համաձայնագրի բանակցային գործընթացի և սպասվելիք նախաստորագրման շուրջ կազմակերպված քննարկմանը մասնակցում էին նաև քաղաքացիական ակտիվիստներ:
Քաղաքացի Կարեն Վարդանյանի կարծիքով՝ միանշանակ պետք է հանրաքվեի դրվի Ասոցացման պայմանագիրը: Պատճառները մի քանիսն են. նախ՝ սա այն ինստիտուտն է, որը, բացի ժողովրդին լիարժեքորեն արտահայտվելու հնարավորություն ընձեռելուց, ըստ էության իշխանությունների համար ելք է՝ խուսափելու բոլոր կարգի հնարավոր արտաքին ճնշումներից:
Բացի այդ, նրա խոսքով՝ մեր երկրի ապագան բոլորովին այլ ձևաչափում է. «Ես չեմ տեսնում մեր երկրի ապագան որևէ միջազգային միության ձևաչափում՝ հետևյալ պատճառներով. մենք իսկապես պետք է գիտակցենք, որ եզակի ժողովուրդ ենք՝ եզակի պատմությամբ և եզակի աշխարհագրական դիրքով, մենք իսկապես կամուրջ ենք Արևմուտքի և Արևելքի, անցյալի և ապագայի միջև:
Սա նշանակում է, որ մենք պետք է լինենք ամեն տեղ, չպետք է լինենք ոչ մի տեղ, այսինքն՝ պետք է մասնակցենք և ՀԱՊԿ-ին, և ՆԱՏՕ-ին, և Ասոցացման պայմանագրին, բայց լիարժեք անդամ չպետք է լինենք և ոչ մի տեղ: Ընդհանրապես՝ 2040-ի հատվածներում ճիշտը չեզոք պետության կարգավիճակի ձեռք բերումն է»,- ասաց նա:
Լուսանկարը՝ PanARMENIAN Photo-ի
