Լոս Անջելեսի 17-ամյա սևամորթ դեռահասի սպանության ենթադրյալ մեղավոր Ջորջ Ցիմերմանին արդարացնող դատավճռից դժգոհ բողոքի ակցիայի մասնակիցների վրա իրավապահ մարմինները կրակել են ռետինե փամփուշտներով: Մի քանի մարդ տեղափոխվել է հիվանդանոց՝ հայտնում է RT-ն:
Վերջինս մեղադրվում էր 17-ամյա Թրեյվոն Մարտինին սպանելու մեջ: Դժգոհ նրա արդարացումից՝ մարդիկ բողոքի ակցիաներ էին կազմակերպել:
Շատերի ձեռքին պաստառներ են՝ հետևյալ գրությամբ. «Չկա արդարություն», «Իրավահավասարություն բոլորի համար»: Ակցիայի որոշ մասնակիցներ կրել են «Գնդակահարիր ինձ, ես սևամորթ եմ» գրությամբ մարզաշապիկներ:
Լոս Անջելեսում բախումներն սկսվել էին այն բանից հետո, երբ երթի մասնակիցները սկսել էին շշեր նետել իրավապահների ուղղությամբ:
Հեռուստաալիքի տվյալով՝ մարդիկ դուրս են եկել բողոքելու նաև Նյու Յորքի Թայմս Սքվեր հրապարակում: Այս մասին հայտնում են ակցիայի մասնակիցներն ու ականատեսները: Հրապարակին հարող փողոցների մի մասը փակվել է, ինչի հետ կապված՝ առաջացել են խցանումներ:
Ականատեսների խոսքով՝ մի քանի մարդ արդեն ձերբակալվել է, սակայն պաշտոնապես այդ տեղեկությունը դեռ չի հաստատվել:
Որոշ տվյալների համաձայն՝ նմանատիպ ակցիաներ, թեև ոչ այդքան զանգվածային, տեղի են ունենում նաև Սան Ֆրանցիսկոյում և Բոստոնում, ինչպես նաև ԱՄՆ մի շարք այլ քաղաքներում:
Թրեյվոն Մարտինը սպանվել էր 2012թ. փետրվարի 26-ին՝ Սենֆորդի արվարձանում: Նրա սպանության մեջ մեղադրվում էր պարեկ Ջորջ Ցիմերմանը: Շատերը վստահ են, որ սպանությունը կատարվել է ոչ թե ինքնապաշտպանությունից դրդված, այլ ռասիզմի պատճառով:
