ԱՄՆ աֆրոամերիկացի բնակչության ներկայացուցիչները մտադիր են առաջիկայում զանգվածային բողոքի ակցիաներ անցկացնել՝ պահանջելով մեծ արձագանք գտած Ջորջ Ցիմերմանի գործով արդարացնող դատավճռի վերանայում: 29-ամյա իսպանախոս ամերիկացուն Ֆլորիդայի Սենֆորդ քաղաքի դատարանը երեկ անմեղ է ճանաչել՝ 17-ամյա սևամորթ դեռահաս Տրեյվոն Մարտինի չկանխամտածված սպանության մեջ (2012-ի փետրվարի 26-ին, Օռլանդոյի Սենֆորդ արվարձանում): Այս մասին հայտնում է ITAR-TASS –ը:
ԱՄՆ սևամորթ բնակչության առաջխաղացման խթանման ազգային ասոցիացիայի ղեկավար Ռոսլին Բրոքն արդարադատության նախարարությանը կոչ է արել անհապաղ անցկացնել սպանված դեռահասի քաղաքացիական իրավունքների խախտման հետաքննություն:
Նա հավելել է, որ Ցիմերմանի գործը ցույց է տալիս ամերիկյան դատարանների որոշումների ռասայական ուղղվածությունը:
Ելույթներ տեղի կունենան Նյու Յորքում, Չիկագոյում, Մայամիում, Օռլանդոյում, Տամպայում, Սան Դիեգոյում, Լոս Անջելեսում, Սան Անտոնիոյում և երկրի այլ քաղաքներում:
Կազմակերպիչները նշել են, որ բողոքի ցույցերը կկրեն բացառապես խաղաղ բնույթ: Այդ քաղաքների ոստիկանությունը բերվել է պատրաստության բարձր աստիճանի:
