Ֆրանսիայի նախագահ Ֆրանսուա Օլանդը հայտարարել է, որ երկրի տարածքում թույլ չի տա թերթաքարային գազ արդյունահանել, քանի որ դա կապված է բնապահպանական մեծ ռիսկերի հետ:
«Ես ձեզ շատ պարզ կպատասխանեմ. քանի դեռ ես եմ Ֆրանսիայի նախագահը, Ֆրանսիայում թերթաքարային գազ չի արդյունահանվի»,- ասել է Օլանդը Բաստիլի գրավման օրվա տոնի կապակցությամբ տված հեռուստահարցազրույցի ժամանակ:
Նախագահը հիշեցրել է, որ 2011 թ., երբ սոցիալիստները դեռ իշխանության չէին եկել, խորհրդարանը քվեարկել էր հիդրոպայթյունների միջոցով թերթաքարային գազի արդյունահանման դեմ:
Օլանդի խոսքերով՝ ներկայիս խորհրդարանական մեծամասնությունն օրենսդրության մեջ փոփոխություններ չի մտցնի, քանի որ թերթաքարային գազի արդյունահանումը կապված է բնապահպանական մեծ ռիսկերի հետ:
