Վաղը «Արամ Խաչատրյան» համերգասրահում տեղի կունենա Լիդուշիկի (Լիդա Առաքելյան) «Փոքրերի աշխարհ» խորագրով մենահամերգը: Համերգից առաջ լրագրողների հետ հանդիպմանը փոքրիկ երգիչն ասաց, որ համերգի միտքը ծագել է դեռևս անցյալ տարի, երբ թողարկվեց իր առաջին ձայնասկավառակը: Նա ստացավ առաջարկներ՝ մենահամերգով հանդես գալ Գյումրիում և ԱՄՆ-ում, որից հետո որոշեց երգել նաև Երևանում. «Իմ կարծիքով՝ սա լավ առիթ էր արդեն երկու համերգներից հետո Երևանում մենահամերգ ունենալ: Այս մենահամերգն ավելի պատասխանատու է, քանի որ իմ մայրաքաղաքում է, լինելու է հրաշալի շոու ծրագիր և մի անակնկալ, որը դեռևս բացված չէ: Կզվարճանանք միասին, կերգենք, կպարենք, կունենանք անմիջական շփում»:
Մենահամերգին ներկա են լինելու նաև Չեխիայից հատուկ համերգին մասնակցելու համար ժամանած Դիանա Քալաշովան և ֆրանսահայ երգիչ Րաֆֆի Արտոն:
Դիանա Քալաշովան ասուլիսի ընթացքում ասաց, որ ինքն ու Լիդուշիկը լավ ընկերներ են, ծանոթացել են 2011-ին՝ «Նովայա Վոլնա»-ի ժամանակ, և շատ ուրախ է ընկերուհուց հրավեր ստանալու համար:
