«Առաջին լրատվական»-ի զրուցակիցն է Հայաստանի Պահպանողական կուսակցության նախագահ Միքայել Հայրապետյանը:
– Պարոն Հայրապետյան, մեզանում առավելապես խոսվում է Եվրամիության հետ Ասոցացման համաձայնագրի առավելությունների մասին, իսկ որո՞նք են, Ձեր կարծիքով, դրա վտանգները:
– Անձամբ որևէ վտանգ չեմ տեսնում: Եթե ենթատեքստում նկատի ունեք, որ համաձայնագրի ստորագրմամբ Հայաստանը կառաջացնի Ռուսաստանի ցասումը, ապա անհանգստանալ պետք չէ, քանի որ Հայաստանն այն կհանդգնի ստորագրել միայն Եվրամիության և Ռուսաստանի համաձայնության պարագայում:
– Ի՞նչ կստանա Հայաստանը պայմանագրի ստորագրման դիմաց և ի՞նչ կկորցնի:
– Վերջապես կստանա առանց միջնորդավորման արևմտյան քաղաքակրթությանը հաղորդակցվելու հնարավորություն. դա պետք է քաղաքական և տնտեսական անցողիկ նպատակահարմարություններից առաջ դիտարկել քաղաքակրթական տեսանկյունից: Իսկ կկորցնի, թեև աստիճանաբար, վարդանիկներին ու լիսկաներին՝ դրանից բխող համակարգային հետևանքներով:
– Արդյո՞ք Ասոցացման համաձայնագրի ստորագրումը չի սպառնում Հայաստանի անվտանգությանը: Ի վերջո, Հայաստանն իր անվտանգություն ապահովումը հանձնել է Ռուսաստանին:
– Անվտանգությունը պետք չէ նեղացնել մինչև պաշտպանություն: Հակառակը՝ անվտանգությունն է՛լ ավելի ապահովված կլինի, իսկ պաշտպանության հատույթում կշարունակի գործել ռուս-հայկական պայմանագիրը: Հայաստանն ընդամենը պետք է խելացի լինի:
– ԵՄ-ն պատրա՞ստ է Հայաստանի հետ «ասոցացվել» Ղարաբաղի խնդրով հանդերձ։ Արդյոք Ասոցացման համաձայնագիրը ստորագրելով վտանգի տակ չի՞ հայտնվի ԼՂ հիմնահարցը:
– Եվրոպան եթե պատրաստ չլիներ, ապա այդ խնդիրը չէր առաջադրի: Իսկ Արցախի ներկա ստատուս-քվոն կփոխվի միայն երկու դեպքում. նախ՝ լայն առումով տարածաշրջանային ստատուս-քվոյի փոփոխության պարագայում, իսկ թե դա երբ կլինի, գուշակել չարժե, այլ՝ պատրաստվել, երկրորդ՝ եթե այդ ստատուս-քվոն մեր ազգային գիտակցական մակարդակում ի վնաս մեզ փոխվի, և մենք հոգեբանորեն կապիտուլյանտ դառնանք, ինչի ընթացքը մեր գավառական պետականավարման հետևանքով, ցավոք, արդեն իսկ նկատելի է:
