Վերաքննիչ քրեական դատարանը մերժեց «Սասնա ծռեր» խմբի անդամ Թաթուլ Թամրազյանի կալանքի դեմ բողոքի քննությունը: Վերջինիս փաստաբան Մոնիկա Մարգարյանը լրագրողների հետ զրույցում նշեց, որ դեռևս հայտնի չէ, թե ինչ հիմքով է դատարանը բողոքը մերժել, սակայն վարույթն իրականացնող մարմինը ներկայացրել է իր դիրքորոշումը, գտնում է, որ Թ. Թամրազյանը, եթե ազատության մեջ գտնվի, հնարավոր է, թաքնվի կամ խոչընդոտի գործի քննությունը, սակայն որևէ փաստարկ չի ներկայացվել և չի հիմնավորվել:
Մոնիկա Մարգարյանը տեղեկացրեց, որ Թաթուլ Թամրազյանը դեռևս «Դատապարտյանների հիվանդանոց»-ում է: Նրան օրվա մեջ մի քանի անգամ ցավազրկող են ներարկում, շարժումները սահմանափակ են, գրեթե չի քայլում, մի քանի ամիս հետո անհրաժեշտ կլինի երկրորդ վիրահատությունն անել:
Թաթուլ Թամրազյանը վիրավորվել էր հուլիսի 17-ին՝ ոստիկանության ՊՊԾ գնդի գրավման առաջին օրը: Նա ունի որովայնի հրազենային վիրավորում:
Փաստաբանը նշեց նաև, որ պատրաստվում է դիմել Գլխավոր դատախազություն, քանի որ իր պաշտպանյալին գործի վերաբերյալ փաստաթղթերը ռուսերեն թարգմանված չի ներկայացվել: «Թամրազյանը ռուսաական կրթություն ունի, սակայն որևէ թարգմանված փաստաթուղթ չի փոխանցվել»,- ասաց փաստաբան Մոնիկա Մարգարյանը:
Մանրամասները՝ տեսանյութում:
