Գորիսի ալրաղացի տնօրեն Սպարտակ Հակոբյանը Aravot.am-ի հետ զրույցում հերքել է լուրերը, թե իր և Սյունիքի նախկին մարզպետ Սուրիկ Խաչատրյանի հարաբերությունները կտրուկ վատացել են:
«Մենք երեսուն տարվա ընկերներ ենք, մեր փոխհարաբերություններն այն մակարդակի վրա չեն, որ մեկս մյուսին ճնշենք: Ես տնտեսությամբ զբաղվող մարդ եմ, դաշտ ցանող տղա եմ, ովքեր իրենց բան ու գործը թողած սրա նրա մասին զրպարտանքներով են խոսում, թող իրենց անունը գրեն: Տան խնդիր չունեմ, ես տուն էլ ունեմ, տեղ էլ ունեմ: Ամեն ինչ էլ ունեմ, ինձ ոչ մեկի տունը պետք չէ: Ոչ էլ Գորիսի իր առանձնատունը գնելու առաջարկություն են ինձ արել: Համոզված եմ, որ Սուրիկ Խաչատրյանը ոչ էլ մտադիր է իր տունը վաճառել: Դեռ շարժումը չսկսած` այդ մարդու հետ ընտանիքներով ընկերություն ենք սկսել: Այդ ընկերությունը բարձր մակարդակի վրա է և այդպես էլ կշարունակվի: Իմ հարաբերությունները նրա հետ արտակարգ մակարդակի վրա են, հարգանքից բացի, մեր մեջ ուրիշ ոչինչ չկա»,- ասել է պարոն Հակոբյանը` հերքելով նաև լուրերը, թե Սուրիկ Խաչատրյանն իրենց ստիպում է գնել Գորիսի իր առանձնատունը (լուսանկարում):
Հարցին, թե Սուրիկ Խաչատրյանի ընտանիքին կապում են թմրանյութերի բիզնեսի հետ , հավաստի՞ են այդ տեղեկությունները, պարոն Հակոբյանն ասել է. «Համոզված եմ, որ դա հերթական բամբասանքն ու սուտն է` ստեղծված իրավիճակից օգտվելով: Էդ մարդու հետ մենակ ե՞ս եմ շփվել: Եթե դա որևէ մեկին ձեռնտու է, համոզված եմ, որ Սուրիկ Խաչատրյանին ճանաչողները ծիծաղում են նման նյութեր կարդալիս: Նա ծխողներին է նախատում` մի ծխեք, ձեր առողջությունը պահեք, էդ ո՞նց եղավ, թմրանյութերի բիզնես է ղեկավարում»:
Նյութն ամբողջությամբ կարդացեք aravot.am-ում:
Լուսանկարը` shamshyan.com
