Լեհ կինոռեժիսոր Մաչեյ Ադամեկի «Լուսանկարը» ֆիլմը ցուցադրվեց «Ոսկե ծիրան» միջազգային կինոփառատոնի շրջանակներում: Սա լեհ ռեժիսորի առաջին խաղարկային ֆիլմն է. մինչ այս նկարել է բացառապես փաստավավերագրական ֆիլմեր:
«Երբ առաջին անգամ դիտեցի այս ֆիլմի կադրերը, հասկացա, որ շատ է տարբերվում վավերագրականից»,- ասաց նա:
Նրա խոսքով՝ լեհական կինոյում շատ ֆիլմեր են նկարահանվում՝ տարեկան 50, որոնցից առնվազն 10-ը դեբյուտային ֆիլմեր են: Մաչեյ Ադամեկը նշեց, որ այսօր երիտասարդ ստեղծագործողները կինոյում իրենց ձայնն են բարձրացնում. «Այնպես որ՝ Լեհաստանում կինեմատոգրաֆիան շատ աշխույժ վիճակում է»:
Ֆիլմերի ֆինանսավոումը պետբյուջեից քանի՞ տոկոսն է կազմում՝ հարցին ռեժիսորը պատասխանեց, որ Լեհաստանում Կինոյի և արվեստի ինստիտուտը ֆինանսավորում է ֆիլմի ծախսերի հիսուն տոկոսը, խնդիրը մյուս հիսուն տոկոսը գտնելու մեջ է:
Ֆիլմն այն մասին է, թե ինչպես է 16-ամյա Ադամը գտնում իր մոր լուսանկարը, որտեղ նա հղի է և երջանիկ՝ մի անծանոթ տղամարդու կողքին, որից հետո տղան սկսում է փնտրել իր իսկական հորը և բացահայտում անցյալի գաղտնիքները:
Ֆիլմը Մոնրեալում արժանացել է «Արծաթե զենիթ» մրցանակի՝ լավագույն առաջին լիամետրաժ ֆիլմի համար:
Լուսանկարը՝ PanARMENIAN Photo-ի