Ավելի վաղ տեղեկացրել էինք, որ հուլիսի 5-ի վաղ առավոտվանից Թեղուտ և Շնող գյուղերի բնակիչները փակել էին դեպի հանքավայր տանող ճանապարհը՝ թույլ չտալով հանքի աշխատողներին այնտեղ հասնել։ Բնակիչները բողոքում էին դեպի մատուռ տանող ճանապարհին օրեր առաջ տեղադրված դարպասների և հսկվող անցակետի դեմ՝ պահանջելով հանել դրանք և իրենց ելքն ու մուտքը չխոչընդոտել այդ տարածքում, դադարեցնել ծառահատումը, բացել ճանապարհը դեպի գերեզմանատուն, փոշու դեմն առնել, որը խեղդում է՝ անընդհատ երթևեկող, բազմաթիվ բեռնատար և այլ աշխատանքային մեքենաների պատճառով: Հիմա գյուղացիները ստիպված են «Թեղուտ» ՓԲԸ-ից թույլտվույթուն հարցնել այնտեղ գնալու համար, մինչդեռ ընկերության աշխատակիցներն ասում են, որ դա միայն նրանց անվտանգության համար է:
«Առաջին լրատվական»-ի հետ զրույցում «Համահայկական բնապահպանական ճակատի» անդամ, բնապահպան Լևոն Գալստյանը մասնավորեցրեց, որ այդ ճանապարհը տանում է մատուռ և գերեզմաններ, այժմ դարպասի պատճառով գյուղացիները, փաստորեն, չեն կարողանում գնալ այնտեղ։ «Երկու շաբաթ առաջ գնացինք հանքի տարածք, գյուղացիների հետ խոսել ենք, իրենք բողոքում էին և՛ ճանապարհի դարպասից, և՛ բազմաթիվ այլ խնդիրներից։ Պայթեցումների պատճառով փոշին շատացել է, և գյուղի դիմացի սարը փոշով է պատվում, և ասում են նույնիսկ սարը նորմալ չի էլ երևում։ Օրվա վերջին ջրցան մեքենաներով պետք է ջրեն, որ փոշին քիչ բարձրանա. դա էլ տասնհինգ օրը մեկ անում են կամ չեն անում: Սկզբում, երբ պայթեցումներն անում էին, գյուղի տները ցնցվում և ճաքում էին»,- ասաց նա:
Լևոն Գալստյանի խոսքերով՝ գյուղացիներն էլ են հասկանում վնասներն ու վտանգները, բայց ոչինչ անել չեն կարող. «Գյուղապետի հետ էլ ենք խոսել, բայց դե հիմա դա է վիճակը: Բոլորն էլ հասկանում են, որ հետագայում երբ հանքը շահագործեն, իրենք այդ տարածքում՝ որպես այդ գյուղի բնակիչ, չեն կարող ապրել, պետք է թողնեն-հեռանան»:
Նշենք, որ գյուղացիների բողոքներին արձագանքել է նաև Լոռու մարզպետ Արթուր Նալբանդյանը՝ նրանց վստահեցնելով, որ ցանկության դեպքում անարգել կարող են գնալ մատուռ:
