Անգլիայի Բրայթոն առողջարանում օգոստոսի 4-ին հանրային այցելության համար բացվել է շարժական դիտահարթակ ունեցող աշխարհի ամենաբարձր աշտարակը՝ British Airways i360-ը: Առաջին զբոսաշրջիկները բարձրացել են թափանցիկ ապակուց պատրաստված շարժական դիտահարթակի տեսածիր, որը փաստորեն իրենից ներկայացնում է թռչող ափսեի նմանվող վերելակ: Այն ուղղահայաց շարժվում է հսկայական առանցքային սյունով։
Այդ առանցքի բարձրությունը 161 մետր է, իսկ լայնությունը՝ ընդամենը 4 մետր: Այսպիսով, նրա հաստության և բարձրության հարաբերակցությունը կազմում է 1:40, ինչը համաշխարհային ռեկորդ է:
Ամենաբարձր կետից, որտեղ զբոսաշրջիկներին հասցնում է հարթակը, տեսարան է բացվում դեպի Լա Մանշ և Արևելյան ու Արևմտյան Սասեքսի կոմսությունների առափնյա 42-կիլոմետրանոց տեղամաս:
Ատրակցիոնի ստեղծողը Marks Barfield Architects ճարտարապետական միությունն է, որը ղեկավարում են Դևիդ Մարկս և Ջուլի Բարֆիլդ ամուսինները՝ ամբողջ աշխարհում հայտնի London Eye դիտանիվի նախագծի հեղինակները. այն գտնվում է Թեմզայի ափին:
British Airways i360-ի տոմսն արժե 15 ֆունտ ստերլինգ (գրեթե 20 դոլար)՝ չափահասների համար, 12,5 ֆունտ (16 դոլարից ավելի)՝ տարեց մարդկանց և ուսանողների համար, և 7,5 ֆունտ (շուրջ 10 դոլար)՝ 4 տարեկանից բարձր տարիքի երեխաների համար: Իսկ ավելի փոքրերն ատրակցիոնից օգտվում են անվճար։
