«14-15 օր լրագրողական փայլուն աշխատանք կատարվեց՝ բազմակողմանիության սկզբունքը պահպանելով։ Այդ առումով ինձ համար անհասկանալի էր Սերժ Սարգսյանի՝ լրագրողներին ուղղված խոսքը»,- «Առաջին լրատվական»-ի հետ զրույցում ասաց միջազգային իրավունքի մասնագետ Արա Ղազարյանը։ Նրա խոսքով՝ գուցե նախագահը կարող է մոռանալ կատարվածը, բայց կատարվածը տեղավորվում է օրենքի շրջանակներում, իսկ նախագահը օրենքի, Սահմանադրության երաշխավորն է։ «Այսինքն՝ իրավունքի, օրենքի գերակայության տեսանկյունից նախագահի խոսքը որևէ նշանակություն չունի օրենքի առջև»,- հավելեց Ղազարյանը։
Ինչ վերաբերում է այս օրերին իրավապահ կառույցների կողմից տարածվող հաղորդագրություններին, որտեղ մեկ կիրառվում էր «զինված խումբ», մեկ «ահաբեկիչներ» տերմինները, ապա Ղազարյանի խոսքով՝ այս իրավիճակը նույնությամբ արտահայտում է այն անորոշությունը, որը հիմա տիրում է ամբողջ աշխարհում ահաբեկչություն կոչվող երևույթի նկատմամբ։ «Շատ դժվար է երևույթը կոչել ահաբեկչություն, երբ անձինք ապստամբել են կամ դուրս են եկել ազգային-ազատագրական պայքարի։
Հենց դա է պատճառը, որ շատ պետություններ չեն ուզում ազգային-ազատագրական պայքարը նույնացնել ահաբեկչության դեմ։ Եվ անձանց, ովքեր դուրս են եկել ազգային-ազատագրական պայքարի՝ կոչել ահաբեկիչներ, թեև քրեաիրավական դաշտում նրանց արարքները տեղավորվում են ահաբեկչության տիրույթում։ Դա է պատճառը, որ նույն անորոշությունն էր նաև մեր իրավապահ մարմինների մոտ»,- նկատեց իրավաբանը։
Ղազարյանի խոսքով՝ սկզբնական շրջանում որոշում էր կայացվել, որ եթե նրանք զենքը վայր դնեն, կազատվեն քրեական պատասխանատվությունից, այսինքն՝ քաղաքական որոշում էր կայացվել, սակայն հետո ԱԱԾ-ն, խախտելով անմեղության կանխավարկածը, հայտարարեց, որ ձերբակալվել են 20 ահաբեկիչներ։ Իսկ այսօր արդեն այդ տերմինը այլևս չի կիրառվել պաշտոնական հաղորդագրություններում։ «Այսինքն՝ սկզբից մինչև վերջ անորոշություն է»։
Ինչ վերաբերում է «Սասնա ծռեր» խմբի տղաների պատժին, ապա Ղազարյանի խոսքով՝ ծանր մեղադրանքներ են առաջադրված, և դժվար է ասել, թե ինչ զարգացումներ կլինեն։ Հնարավոր է նաև մեղադրանքները փոփոխվեն, լրացվեն, նոր մեղադրանքներ առաջադրվեն կամ հանվեն։ «Այսինքն՝ դեռ վաղ է պատժի մասին խոսել»,- նկատեց Ղազարյանը։
Առավել մանրամասն՝ տեսանյութում:
