Թուրքական Milliyet թերթի փոխանցմամբ՝ թուրք օրենսդիրները կքննարկեն երկրի հարավ-արևելքում վարչական բաժանումներում փոփոխություններ կատարելու հարցը, որտեղ մոտ մեկ տարի է՝ ընթանում են հակաահաբեկչական ինտենսիվ գործողություններ:
Մասնավորապես, առաջարկվում է լուծարել Շըրնաք և Հաքքարի նահանգները, որոնք սահմանակից են Իրաքին, Իրանին ու Սիրիային: Համապատասխան նախագիծը խորհրդարանին է ներկայացրել ՆԳՆ-ն:
Ըստ այդմ՝ Հաքքարի և Շըրնաք տարածաշրջանային կենտրոնները կզրկվեն իրենց անվանումներից և կվերածվեն համապատասխան Չոլոմերիք ու Նուհ շրջանների:
Ներկայիս Հաքքարիի տարածքում ի հայտ կգա Յուքսեքօվա նահանգը, իսկ Շըրնաքի տարածքում՝ Ջիզրե նահանգը: Յուքսեքօվա և Ջիզրե քաղաքները, որոնք մոտ են պետական սահմաններին, կդառնան այդ նահանգների կենտրոնները:
Հաքքարի և Շըրնաք քաղաքների համար նոր անվանումները պատահական չեն: Չոլոմերիքն ու Նուհը տվյալ բնակավայրերի պատմական քրդական անվանումներն են: Վարչական այդ փոփոխությունների անհրաժեշտությունը թելադրված է անվտանգության նկատառումներով:
Նախորդ տարվա աշնանից թուրքական անվտանգության ուժերը մասշտաբային գործողություններ են իրականացնում այդ շրջաններում: Իշխանությունների կարծիքով՝ Ջիզրեն ու Յուքսեքօվան հեռու են գտնվում նահանգների կենտրոններից, ինչը նվազեցնում է PKK-ի դեմ նրանց գործողությունների արդյունավետությունը:
Բացի այդ, քուրդ զինյալների համար ավելի հեշտ է գրավել սահմանային այդ քաղաքները, քան փորձել ներթափանցել ավելի խորքեր՝ դեպի նահանգի կենտրոն:
