«Նոր զարգացումներ և նոր իրավիճակ «Սասնա ծռեր» խմբի կողմից զենքը վայր դնելուց հետո: Երկշաբաթյա զինված դիմադրության արդյունքներն ու սպասվող զարգացումները». այս թեմայով այսօր «Բլից ինֆո» մամուլի ակումբում հրավիրված մամլո ասուլիսում ելույթ ունեցավ «Մոդուս վիվենդի» կենտրոնի ղեկավար, քաղաքագետ Արա Պապյանը:
«Հասարակությունը իրապես հայտնվել էր մի տեսակ մրափի մեջ և որևէ ելք չէր տեսնում: Հիմա՝ այսօր, վերջին իրադարձություններից հետո իրավիճակ է փոխվել, և Հայաստանը նույնը չի լինի, ինչպիսին այս իրադարձություններից առաջ էր: Կլինի՞ ավելի լավը կամ ավելի վատը, դեռևս վաղ է ասել, այդ եկու հնարավորություններն էլ կան, հիմնականում կախված է իշխանությունների դիրքորոշումից: Եթե իշխանությունները, ավելի հստակ՝ եթե Սերժ Սարգսյանը գնա ռեպրեսիաների ընդլայնմանը՝ պատժիչ գործողություններ և այլն, բնականաբար հասարակությունը ավելի ծայրահեղ քայլերի կդիմի, կմեկուսանա, տնտեսական վիճակը կբարդանա, արտագաղթի ծավալները կմեծանան:
Եթե հետևություններ արվեն և փորձ արվի հասկանալ, թե ինչու հասարակության մի մասը դիմեց զենքի, և փորձ արվի ուղղելու հենց բուն պատճառները և ոչ թե հետևանքները, ապա մենք հույս ունենք, որ որոշակի շտկում կլինի: Արմատական մեծ փոփոխություններ չենք ակնկալում:
Այս 15 օրվա դիմակայությունը ցույց տվեց, որ, ցավոք, մեծ թերություններ կան մեր պետական կառավարման ոլորտում, առաջինը՝ մենք, ըստ էության, գրեթե Գործադիր իշխանություն չունեինք, կազմալուծված վիճակի մեջ էր գտնվում, և միայն ոստիկանական մեթոդներ էին կիրառվում. այսինքն՝ մենք չտեսանք կառավարության անդամների, որ հանդես գան ինչ-որ դիրքորոշմամբ, ուղերձով, մենք չտեսանք կառավարության նիստ, նույնը Ազգային ժողովի մասին կարելի է ասել, որը գրեթե գոյություն չուներ, բացառությամբ մի քանի պատգամավորի, որոնք մասնակցում էին, սակայն պատգամավորների մեծ մասը չարձագանքեց: Սա բավականին վատ է, որովհետև առաջիկայում մեզ սպասվում է խորհրդարանական հանրապետություն, այսինքն՝ այնտեղ պետք է կուսակցությունները դերակատարություն ունենան, եթե այսպես լինի պատկերացնում ենք, թե մեր վիճակն ինչ կլինի:
Մյուս եզրակացությունն այն է, որ իրավապահ համակարգում, չնայած բազմամիլիոն ներդրումներին՝ լինի Հայաստանի բյուջեից, լինի զանազան արտասահմանյան դրամաշնորհներից, որևէ էական բարեփոխում տեղի չի ունեցել, այսինքն՝ գործում է որպես սովետական տիպիկ միլիցիա, որը չի կարողանում, պաշտպանել իր ամենամեծ զինապահեստը, բայց հաջողությամբ ջարդում է ժողովրդին: Հասկանալի է, որ այդ ոստիկանական զինված և կազմակերպված խմբերը, որոնց թիկունքում օրենքն է և այլ հնարավորություններ ունեն, միշտ էլ ավելի ուժեղ են, խնդիրն այն է, որ գործողությունները օրենքի սահմաններում լինեին, սակայն այդպես չէր: Այս օրերի ընթացքում մենք ունեցանք մարդու իրավունքների զանգվածային խախտումներ, այսինքն՝ հարյուրավոր մարդկանց բերման ենթարկելու երևույթն ինքնին անօրինական է, որովհետև բերման ենթարկելու համար պետք է ունենալ կարգավիճակ, դրա համար որոշում է պետք, առանց որոշման իրավունք չկա բերման ենթարկել, բերման ենթարկելուց հետո ծեծերը, ստորացումները, անհասկանալի հայտարությունները և այլն՝ այս ամբողջը մեր պետականության թերությունների մասին է վկայում:
Այստեղ մտահոգիչ է այն, որ ընդամենը մի գունդ էր գրավվել, և պետությունը կազմալուծված էր, Աստված չանի պատերազմ լինի, և մի քանի գունդ ենթարկվեն գրավվման կամ ոչնչացման… Այսինքն՝ ստացվում է մի վիճակ, որ կառավարությունը, այսինքն՝ Օրենսդիր և Գործադիր իշխանությունները երկուսն էլ պատրաստ չեն:
Մյուս մտահոգիչ քայլն այն էր, որ երկրի նախագահը երկու անգամ ուղերձներ հղեց, երկուսն էլ ժողովրդին չէին ուղղված, այլ ինչ-որ մարդկանց խմբի էին ուղղված, և հստակ բաժանում կար՝ մենք և դուք, մենք և նրանք: ՀՀ նախագահը ՀՀ բոլոր քաղաքացիների նախագահն է՝ գոնե տեսականորեն, և ինձ համար հասկանալի չէ, թե ինչու է ցավակցություն հայտնում, որը իհարկե պետք էր, ոստիկաններին, բայց ցավակցություն չի հայտնում աչքը կորցրած երիտասարդին, ով ընդհանրապես կապ չուներ այս ամենի հետ, կամ այն քաղաքացիներին, որոնք ապօրինի ծեծի են ենթարկվել: Որևէ խոսք չասվեց ոստիկանության ապօրինությունների մասին:
Ո՞վ է այս երկրում Սահմանադրության երաշխավորը. նախագահը, հետևաբար նրանից է կախված հետագա գործողությունները: Սպասենք, տեսնենք առաջիկա օրերին ինչ զարգացումներ կլինեն»:
