«Իշխանություններն այսօր անում են բոլոր այն քայլերը, որոնք խոչընդոտում են հավաքների անցկացումը»,- «Առաջին լրատվական»-ի հետ զրույցում ասաց համակարգող խմբի անդամ Անդրեաս Ղուկասյանը։
Նա կարևորեց, որ Կարմիր խաչն իր վրա վերցնի գնդի տարածքում վիրավորների բուժօգնության հարցը, որով կարող է հանգուցալուծվել տղաների մոտ գտնվող բժիշկներին ազատ արձակելու հարցը։ «Ըստ էության, այդ առումով գնդակը գտնվում է Սերժ Սարգսյանի դաշտում, որովհետև ինքը պետք է համաձայնություն տա Կարմիր խաչի այդ առաջարկին, որը շատ ողջամիտ է։ Եվ այդ առաջարկը մերժելը նշանակում է, որ դիտավորություն կա անձանց առողջության հետ կապված։ Եվ եթե նրանց հետ մի բան պատահի, ապա պատասխանատվությունը ընկնում է Սերժ Սարգսայանի վրա»,- ասաց Ղուկասյանը։
Հաջորդ խնդիրը, Ղուկասյանի խոսքերով այն է, որ առ այսօր չկա որևէ ամփոփ տեղեկություն գնդի տարածքի բնակիչների վերաբերյալ։ «Մենք փորձում ենք ամեն գնով ստանալ այդ տեղեկությունը և հավաքագրել, քանի որ տարբեր լուրեր կան, որ այդ մարդկանց ստիպողաբար փորձում են դուրս բերել իրենց տներից, որն է դրա իրավական հիմքերը։ Սա, ըստ էության, խնդիր է, որը պետք է հստակեցվի, քանի որ ուժայինները որևէ իրավական հիմք չունեն բնակչությանը նման պահանջներ ներկայացնել, գործեր հարուցել։ Մենք պետք է դրա մասին բարձրաձայնենք և Սերժ Սարգսյանին դրդենք այդ իրավիճակի համար իրավական հիմքեր սահմանել»,- ավելացրեց Ղուկասյանը։
Ինչ վերաբերում է խորհրդի կազմին և օր օրի անդամների նկատմամբ ձևավորվող անվստահությանը, ապա Ղուկասյանի խոսքերով՝ սկզբնական շրջանում խումբը գործում էր իրադարձությունների զարգացմանը զուգահեռ, բայց հետո իրավիճակ փոխվեց, ինչի համար անհրաժեշտ է քայլ առաջ մտածել։ «Մեր վերջին հանդիպման ժամանակ մենք եկանք հայտարարի, որ Սերժ Սարգսյանը գնում է ուժ գործադրելու ճանապարհով, նպատակ ունի ապստամբներին ճնշել այնքան, մինչև նրանք զենքը վայր դնեն։ Հյուծում է նրանց»,- նկատեց մեր զրուցակիցը՝ ավելացնելով. «Հանրության գործառույթն այս օրերին այն է, որ թույլ չտա ուժ գործադրել, դրա համար կոնցեպցիան այն է, որ քննարկվում է այն, որ վերջնագիր ներկայացվի իշխանություններին դադարեցնել ուժային գործողությունները»։
Առավել մանրամասն՝ տեսանյութում։
