Ազգային վիճակագրական վարչության տվյալների համաձայն՝ գյուղատնտեսական մթերք արտադրողների կողմից ցորենի և գարու իրացման միջին գները ՀՀ-ում 2006-2010 թթ. հուլիսին հետևյալ պատկերն ունեն. ցորեն՝ 2006թ. 1 կգ` 84 դրամ, 2007` 100, 2008` 127, 2009` 111, 2010` 99, գարի՝ 2006` 103 դրամ, 2007` 117, 2008` 102, 2009` 112, 2010` 108: Հետաքրքիր է, որ գարին ավելի թանկ է, քան ցորենը։ Փորձեցինք պարզաբանում ստանալ գյուղնախարարության բուսաբուծության վարչության պետ Գագիկ Մանուչարյանից: Նախ նա անակնկալի եկավ, որ ցորենի ինքնարժեքը 99 դրամ է և պարզաբանեց. «Այս տարվա օգոստոսին աշխարհում ցորենի ամենաբարձր գները սահմանվեցին: Հետո իհարկե իջան, բայց չիջան նախկին մակարդակին: Մեր տնտեսվարող սուբյեկտները այս տարի 120 դրամից մինչև150 դրամով ցորեն են մթերել: Այսպիսի գին չի եղել երբևէ: Այս դեպքում, որտեղի՞ց է վերցված այդ 99 դրամը՝ ես չգիտեմ»: Ինչ վերաբերում է ցորենի և գարու գների տարբերությանը, Մանուչարյանը բացատրեց, որ ցորենը մեր երկիր ներկրում ենք, և հաջողվում է էժան գներով Ռուսատանից ներկրել: Իսկ գարին հիմնականում տեղական արտադրանք է: «Ավելին՝ կոմբիկերի գինը, որ իրենից բան չի ներկայացնում, բավականին բարձր է, իսկ գարին, մաքուր գարին մեծ էներգետիկ արժեք ունի, և նրա կերամիավորներն ավելի շատ են, հետևաբար գինը պետք է բարձր լինի: Եվ բացատրությունն այն է, որ մեր երկրում անասնապահությունը զարգացում է ապրում, իսկ անասունները կերակրվում են դրանով»,- պարզաբանեց Գագիկ Մանուչարյանը:
