ՀՀ-ում ներառական դպրոցները բավական մեծ թիվ են կազմում, և գնալով դրանց թիվն ավելանում է: Այսօր կայացած մամուլի ասուլիսում այս մասին ասաց «Արազա» կազմակերպության ներկայացուցիչ Թամարա Աբրահամյանը:
«Գնահատել այդ ոլորտի ընդհանուր վիճակը՝ բարդ է, ներառական կրթօջախների մասնագետներ պատրաստելը՝ ևս: Ընդհանուր առմամբ՝ կրթության մասին օրենքում այս մասով բացթողումներ կան: Հատուկ և ներառական դպրոցներում, իմ ունեցած տխուր տեղեկությունների համաձայն, բավարար թվով մասնագետներ չկան: Օրենքում ամրագրված է, որ նման դպրոցները պետք է ակտիվ աշխատանք ծավալեն սոցիալական աշխատողների հետ, ինչը սակայն չի իրականացվում: Այս լրացումներն անհրաժեշտ ու անխուսափելի են»,- ասեց նա:
Ասուլիսի մյուս բանախոս, ԿԳՆ հանրակրթության վարչության պետ Նարինե Հովհաննիսյանն էլ իր հերթին նկատեց, որ իրենց գերատեսչությունը պատրաստ է ներառական կրթության բարեփոխումների հարցում համագործակցել ՀԿ-ների հետ: «Այժմ ներառական դպրոցները 90-ն են, շուտով դրանց թիվը կավելանա 20-ով: Մոտակա երկու տարիներին ներառական դպրոցների քանակը կհասնի 150-ի: Ինչ վերաբերում է հատուկ դպրոցներին, ապա դրանց թիվը 23-ն են, սակայն հետագայում նվազելու են 5-6-ի, գուցե ինչ-որ պահի դրանք ընդհանրապես չլինեն: Նպատակն այն է, որ այդ կրթօջախների սաները իրենց ֆիզիկական և մտավոր հնարավորության սահմաններում ավելի ուշ ներգրավվեն հանրակրթական կամ ներառական կրթության ոլորտներում»,- ասաց նա:
Նարինե Հովհաննիսյանն, ի պատասխան լրագրողներից մեկի հարցադրմանը, հավաստիացրեց, որ հակառակ տարածված խոսակցությունների, դպրոցների տնօրեններին մարզպետները կամ քաղաքապետերը չեն նշանակում: «Խորհուրդը փակ քվեարկությամբ ընտրում է դպրոցի տնօրենին, և վերջինիս հետ պայմանագիր է կնքվում: Մարզեպը, դրանից հետո, որքան էլ ուզի՝ չի կարող իրեն ցանկալի մարդու նշանակել այդ պաշտոնում: Ավելին՝ ասեմ, որ եղել են դեպքեր, երբ մարզպետը ցանկացել է միջամտել այս կամ այն մարդու հարցում, սակայն դա նրան չի հաջողվել։
Թամարա Աբրահամյանն իր հերթին նկատեց, որ ծնողական խորհրդի անդամներ շատ հաճախ նույն դպրոցի ուսուցիչ-ծնողներն են լինում, ինչն անթույլատրելի է:«Ծնողական խորհրդում ուսուցիչ-ծնողների թիվը, մինչդեռ, չպետք է անցնի 2-ից»,- հիշեցրեց նա:
Լուսանկարը՝ PanARMENIAN Photo-ի
