Թուրքական Anadolu լրատվական գործակալության փոխանցմամբ` Թուրքիայի նախագահ Ռեջեփ Էրդողանը Վարշավայում ՆԱՏՕ-ի գագաթնաժողովի շրջանակներում մի շարք երկկողմ հանդիպումներ է ունեցել:
Էրդողանը մասնավորապես հանդիպել է Մեծ Բրիտանիայի վարչապետ Դևիդ Քեմերոնի ու Գերմանիայի կանցլեր Անգելա Մերկելի հետ: Քեմերոնի հետ հանդիպումն անցել է դռնփակ պայմաններում և տևել է 40 րոպե: Մերկելի հետ նրա հանդիպումը նույնպես անցել է դռնփակ պայմաններում: Այն տևել է մոտ մեկ ժամ: Հանդիպումների մանրամասները չեն հաղորդվում:
Հիշեցնենք, որ սա Մերկելի ու Էրդողանի առաջին տետ-ա-տետ հանդիպումն էր այն բանից հետո, երբ հունիսի 2-ին Բունդեսթագը ընդունեց Հայոց ցեղասպանությունը ճանաչող բանաձևը, ինչը կտրուկ սրեց երկու երկրների միջև հարաբերությունները:
Քեմերոնի ու Էրդողանի հանդիպումն էլ կայացավ այն բանից հետո, երբ Քեմերոնը հայտարարեց, որ Թուրքիան ներկայիս տեմպերով ԵՄ-ին կանդամակցի 3000 թվականից ոչ շուտ: Էրդողանը ավելի ուշ կոշտ պատասխան էր տվել Քեմերոնին` հիշեցնելով, որ նրա այդ հայտարությունից ընդամենը 3 օր անց տեղի ունեցավ Brexit-ը:
